सु जुइ चन्द्रमाय् न्हपां थ्यनीम्ह मिसा

अमेरिकी अन्तरिक्ष संस्था नासां २८ अर्ब अमेरिकी डलर खर्च यानाः सन् २०२४ तकया दुने चन्द्रमाय् हाकनं मनूया पलाः तयेगु योजना सार्वजनिक याःगु दु। थ्व योजना कथं न्हापांखुसी चन्द्रमाया सतहय् छम्ह मिसायात नं पलाः तयेकेगु खँ धाःगु दु । ‘आर्टिमस’ नां बियातःगु थ्व अन्तरिक्ष कार्यक्रमय् नासां न्यागू दशक लिपा चन्द्रमाय् छम्ह मिसा व मिजंयात छ्वयेत्यंगु खः । नासां सन् १९७२ इ दकलय् लिपांगुखुसी चन्द्रमाय् मनूया पलाः तयेकूगु खः । तर नासाया थ्व योजना धाःसा अमेरिकी संसदं ३.२ अर्ब डलर गुकथं निकास याइ धयागु खँय् निर्भर जुइ ।

नासाया योजना कथं अन्तरिक्ष यात्रीतय्त ‘ओरीअन’ नांया छगू एपोलो थेंज्याःगु यात्रुवाहक यानय् तयाः चन्द्रमाय् छ्वइ । नासाया प्रशासक जिम ब्रिडेन्सटिनया कथं २८ अर्ब डलरया थ्व योजनाय् प्यदँया दुने थ्व ध्यबा खर्च जुइ । थुकी रकेट, क्याप्सुल, मानव अवतरण प्रणाली, अन्तरिक्ष यात्रीं फिइमाःगु वसःसहित फुक्क खर्च दुथ्यानाच्वंगु दु ।

वय्कःया कथं न्हापांगु ३.२ अर्ब डलर सन् २०२१ य् विकास यायेत्यंगु मानव अवतरण प्रणालीया निंतिं खः । उकिं अमेरिकी संसदं थ्व ध्यबा गुकथं पारित याइ धयागु खँय् तःधंगु रणनीतिक महत्व दु। अमेरिकाया क्वय्या सदनं थ्वयां न्ह्यव हे छगू विधयेक अनुमोदन यासें चन्द्रमाय् अवतरण यायेगु यानया निंतिं ६० करोड डलर छुटे यायेधुंकूगु दु। अथे खःसां थ्व यान निर्माण यायेगु ज्या पूवंकेत नासायात थप ध्यबाया आवश्यक दनि ।

सु जुइ चन्द्रमा वनीम्ह मिसा ?
सन् २०१९ या जुलाइ महिनाय् नासाया प्रशासक ब्रिडेन्सटिनं सीएनएनलिसे खँ ल्हासें चन्द्रमाय् वनीम्ह मिसा गज्याःम्ह जुइ धयागु खँ धाःगु खः । वय्कःया कथं चन्द्रमा वनीम्ह मिसा बांलाक अन्तरिक्ष उडानया अनुभव दुम्ह व अन्तर्राष्ट्रिय अन्तरिक्ष केन्द्रय् च्वनेधुंकूम्ह जुइ । वय्कलं थ्व अन्तर्वार्ता बिउगु इलय् तक नासायाके झिंनिम्ह मिसापिं सक्रिय अन्तरिक्ष यात्री दुगु खः । आः थ्व झिंनिम्हय् थगुने जक तालिम पूवंकूपिं मेपिं न्याम्ह मिस्त थप जुइधुंकूगु दु। थुपिं सन् २०२४ य् चन्द्रमाय् वनेगु निंतिं आवश्यक मापदण्ड दुने लाइ कि लाइमखु धयागु स्पष्ट जूगु मदुनि । चन्द्रमाय् वनीम्ह अन्तरिक्ष यात्री ल्ययेगु ज्या चन्द्रमाय् रकेट प्रक्षेपण याये स्वयां निदँ न्ह्यः हे जुइगु खँ धाःगु दु ।

अमेरिकाया चाहना, चीनया चिउता
चन्द्रमाय् हाकनं मनू छ्वयाः ह्वाइट हाउसं अन्तरिक्षय् थःगु देशया अग्रतायात नवीकरण याये चाहे जूगु खनेदु। अमेरिकां चन्द्रमाया दक्षिण धुर्वय्च्वा पु मालेगु योजना दयेकातःगु दु। यदि थ्व लुइकेफत धाःसा चन्द्रमाय् हे रकेटयात माःगु इन्धन दयेकेत छ्यलेफइ । पृथ्वीं निसें इन्धन ज्वना वनेगु स्वयां थ्व तसकं दंगु जुइ, अले थुकिं चन्द्रमाय् आधारित जुइगु अर्थतन्त्रया आधार तयार याइ ।

तर अमेरिकी उपराष्ट्रपति माइक पेन्सं चीनया अन्तरिक्ष महत्वाकांक्षालिसे स्वानाः थ्व योजनाय् चिउताः प्वंकाच्वंगु दु। सन् २०१९ या जनवरीइ चीनं चन्द्रमाया उगु थासय् रोबटसहितया यान नियन्त्रित रुपं अवतरण याकेत ताःलाःगु खः । थ्व अभियान कथं चीनं चन्द्रमाया चा पृथ्वीइ हयेगु तयारी यानाच्वंगु दु । अथेहे चीनं आः अज्याःगु अन्तरिक्ष यान नं विकास यायेधुंकूगु दु गुकी च्वनाः चिनियाँ अन्तरिक्ष यात्रीत चन्द्रमा थेंज्याःगु भित्री अन्तरिक्ष गन्तव्य तक वनेफइ । चीनया लक्ष्य सन् २०२४ दुने हे धयागु ला मदु, तर थ्व दशकया अन्त्य तक चीनं नं थज्याःगु लक्ष्य दयेकेफु।

थुकथं अभियान न्ह्याइ
नासाया योजना कथं न्हापांगु चरणय् मानवरहित छगू परीक्षण उडान सन् २०२१या शरद यामय् जुइ । आर्टिमस १ नां बियातःगु थ्व यानं चन्द्रमा छचाः चाःहिलाः लिां वइ । नासाया ह्युमेन स्पेसफ्लाइट प्रमुख क्याथी ल्विडर्सया कथं थ्व यानं लछि बिकाः फुक्क कथंया महत्वपूर्ण प्रणालीया परीक्षण याइ । आर्टिमस – २ नं धाःसा थथे हे चन्द्रमाया परीक्रमण याइ, तर मनू सहित । थ्व मिशनय् थप जूगु न्हूगु सुविधा कथं रकेटपाखें ओरीअन छुटे जुया वनेवं चन्द्रमाय् अवतरण व उडानया निंतिं यात्रु थःम्हं हे अन्तरिक्ष यानयात नियन्त्रण यायेफइ । थ्व सुविधां ओरीअनया ज्या यायेगु क्षमतायात बल्लाका बी ।

आर्टिमस ३ धाःसा थ्यंमथ्यं ४८ दँ न्ह्यः एपोलो १७ चन्द्रमाय् वनाः मनूयात चन्द्रमाया धरती अवतरण यायेधुंकाःया न्हापांगु अभियान जुइ । नासां थीथी कम्पनीयात ९०..७ करोड डलर दामं चन्द्रमाय् अवतरण यायेगु यानया डिजाइन व निर्माणया जिम्मा बिउगु दु । थ्व दशकया अन्त तकया दुने नासां चन्द्रमाय् मानव आधारकेन्द्र दयेकेगु योजना दयेकाच्वंगु दु। आर्टिमस आधार शिविर नां बीगु थ्व अभियानं चन्द्रमाय् ताःई तक च्वनाः खोज अध्ययन यायेगु पूर्वाधार दयेकी ।

बिबिसी

सम्बन्धित बुखँ

LEAVE YOUR COMMENTS