लानिपुखूया देगः खुल्ला

येँ (नेपालभाषा टाइम्स) – वंगु लछि न्ह्यः दयेके क्वचाःगु न्हूपुखू थौं सुथय् ५ बजे निसे बहनी ५ बजे तक चायेकीगु जूगु दु । येँ महानगरपालिका व राष्ट्रिय पुनर्निर्माण प्राधिकरणया सहकार्यय् थौं किजापुजा याइपिनिगु निंतिं बालगोपालेश्वर दर्शन याकेगु व्यवस्था याःगु खः ।

वंगु विसं २०७२ वैशाख १२ गते ब्वःगु तःभुखाचं पूर्णरुपं क्षति जूगु न्हू पुखू व बालगोपालेश्वर देगः पुनर्निर्माण जुइधुंकाः न्हापांखुसी थुगुसी द्यः दर्शन यायेगु व्यवस्था याःगु खः । थ्व द्यःयाथाय् तताकेहेँ व दाजुकिजा मदुपिंसं सिन्हः तीगु व तीकेगु याइगु खः । द्यःया दर्शनया निंतिं माःगु सुरक्षा व्यवस्था महानगरपालिकां याइगु खँ धाःगु दु ।

स्वन्ति नखःया लसताय् थीथी पुचःतय्सं याइगु मंकाः म्हपुजा व किजापुजाया ज्या धाःसा थुगुसी स्थगित जूगु दु । येँय् विदेशी पाहांपिंत दँय्दसं म्हपुजा यानाः सांस्कृतिक पर्यटनया विकास यायेगु ज्या जुया वयाच्वंगु खःसा थुगुसी थ्व ज्याझ्वः नं स्थगित जूगु खँ धाःगु दु ।

सम्बन्धित बुखँ

LEAVE YOUR COMMENTS