‘क्रिमसन अस्पतालय् गुल्मीया संक्रमित सीगु बुखँ गलत’

येँ – कोरोना भाइरसया कारणं गुल्मीया छम्ह संक्रमित सित धइगु बुखँ गलत जूगु खँ क्रिमसन अस्पतालं धाःगु दु ।

उगु अस्पतालय् वासः याकाच्वम्ह छम्ह संक्रमित बुधवाः सुथय् मदुगु धकाः वःगु बुखँ गलत व भ्रामक जूगु खँ धाःगु दु । अस्पतालं छगू विज्ञप्तिइ पिथना गुल्मीया मदाने गाउँपालिका-६या ४१दँया संक्रमितयात अस्पतालया भेन्टिलेटरय् तयाः वासः जुयाच्वंगु स्पष्ट याःगु दु ।

अस्पतालं उम्ह मनू छवाः न्ह्यः छ्यँ स्याःगु व ज्वरो वःगु धासें अस्पताल भर्ना जूवःगु धासें अस्पतालय् दुगु इलय् हे कोरोना संक्रमणया पुष्टि जूगु खँ न्ह्यथंगु दु । संक्रमित मनूया अवस्थ गम्भीर जूगुलिं न्यान्हु न्ह्यःनिसें भेन्टिलेटरय् तयाः वासः जुयाच्वंगु खः ।