भारतीय सेनाध्यक्षपाखें नेपाः भ्रमणया तयारी : सैनिक तहलं स्वापू भिंकेगु अवसर

येँ (नेपालभाषा टाइम्स) – भारतीय सेनाया सेनाध्यक्ष मनोजमुकुन्द नरवणें थ्वहे कार्तिक १९ गतेनिसें यायेत्यंगु नेपाः भ्रमण थीथी कारणं यानाः चर्चाया केन्द्रय् लानाच्वंगु दु। खास यानाः भारतं कब्जाय् कयातःगु नेपाःया लिम्पियाधुराय् भारतीय सेनां सतक दयेकाः उलेज्या यायेवं नेपाः-भारत दथुया स्वापू समेत समस्याय् लाःगु खः । लिपांगु इलय् लिम्पियाधुराया सीमा विवादय् भारतीय सेना न्ह्यःने वःगु लिपा सेनालिसे नेपाःया स्वापू स्यनाच्वंगु खः । आः भारतीय सेनाया सेनाध्यक्ष हे नेपाः वयेत्यंगु जुयाः स्यनाच्वंगु थ्व स्वापू भिंकेगु अवसर चूलाइगु नं अनुमान याना हःगु दु ।

लिम्पियाधुराया नेपाःया जग्गाय् सतक दयेकेगु ज्या भारतीय सेनां याःगु खःसा उकिया उलेज्या भारतया रक्षा मन्त्री राजनाथ सिंहं यानादीगु खः । उगु घटनायात कयाः नेपाःया सरकार व राजनीतिक पार्टीतय्सं विरोध याना हःसां नेपाःया सेनां धाःसा छुं टिप्पणी मयाःगु खः । तर भारतीय सेनां धाःसा नेपाल सरकार नं प्रतिरोधय् न्ववाना हःगु खः । नेपाली सेनाया सेनापति भारतीय सेनाया मानार्थ महारथी जुइगु व भारतीय सेनाया सेनाध्यक्ष नेपाली सेनाया मानार्थ महारथी जुइगु चलन दु। उकिं निगू देय्या सेना दथुइ तनाव ब्वलनीगु पाय्छि मजुइगु बिचाः कुटनीतिक ख्यलं तयेगु याना हःगु खः ।

परराष्ट्रविद् हिरण्यलाल श्रेष्ठं निगू देय्या सेना दथुइ विद्यमान थ्व स्वापूयात छ्यलाः निगुलिं देय्या सेना प्रमुखतय्सं नेपाः-भारत दथुइ स्यनाच्वंगु स्वापूयात बांलाकेगु ज्या याये फइगु बिचाः न्ह्यःने तयादीगु दु। लिम्पियाधुराय् भारतया राजनीतिक सिबें नं सैनिक अभिरुची अप्वः दुगु कारणं यदि भारत व नेपाःया सैनिक अधिकारीतय्सं भूमिका म्हितल धाःसा थ्व समस्यायात समाधान याये फइगु बिचाः नं श्रेष्ठं तयादीगु दु ।

थ्व स्वयां न्ह्यः नेपाःया संविधान जारी जूगु इलय् भारतं नेपाः विरुद्ध नाकाबन्दी तःबलय् नं उगु नाकाबन्दी चीकेगु लागिं भारतीय सेनां महत्वपूर्ण भूमिका म्हितूगु खः । पाय्छि अथे हे आः नेपाः-भारत दथुया सीमा विवादयात नं निगू देय्या सैनिकतय्सं समाधान यायेगु भूमिका म्हितेमाःगु बिचाः श्रेष्ठं तयादीगु दु ।

भारतीय सेनाध्यक्षं यायेत्यंगु नेपाः भ्रमण न्ह्यः भारतीय गुप्तचर संस्था ‘रअ’ या प्रमुख नेपाः वयाः तप्यंक प्रधानमन्त्री ओलीयात नापलाःगुलिं भारतीय सेनाध्यक्षया नेपाः भ्रमण लिपा छुं सकारात्मक लिच्वः वइगु खः ला धइगु अनुमान जुयाच्वंगु दु। ‘रअ’ प्रमुख भारतीय सेनाया हे विशेष विमानपाखें नेपाः वःगु खः । प्रधानमन्त्री ओलीयाके हे थौंकन्हय् रक्षा मन्त्रालय नं लानाच्वंगु कारणं भारतीय सेनाध्यक्ष सहभागी जुइगु आपालं ज्याझ्वलय् वय्कलं नं ब्वति काये खनीगु खँ धाःगु दु। थुकिं यानाः भारतीय सेनाध्यक्षयात नेपाःपाखें सकारात्मक सन्देश बीगु ह्वःताः चूलाइगु खन धाःगु दु ।

भारतीय सेनाध्यक्ष नरवणे खास यानाः थःगु मानार्थ महारथी दर्जा ग्रहण यायेगु लागिं हे नेपाः वयेत्यंगु खः । भारतलिसे नेपाःया कडाकथंया विवाद ब्वलनाच्वंगु इलय् हे नेपाः वयेत्यंम्ह भारतीय सेनाध्यक्षयात थन स्वागत् सत्कार यायेम्वाः धाइपिं मनूत नं पिहां वयाच्वंगु दु ।

सम्बन्धित बुखँ

LEAVE YOUR COMMENTS