टेकुया ताँ थुनाः हानं दयेकीगु

येँ – येँया टेकु व कालिमाटी स्वाइगु न्हू दयेकूगु ताँ थुनाः हाकनं दयेकेमाःगु खँ धाःगु दु । पप्पु कन्स्ट्रक्सनं दयेकूगु उगु ताँय् गुणस्तरहीन निर्माण सामग्री छ्यलाः दयेकूगुलिं थुनेमाःगु खँ भौतिक पूर्वाधार तथा यातायात मन्त्री रघुविर महासेठं धयादीगु खः ।वय्कलं म्हिगः संसदया विकास तथा प्रविधि समितिया बैठकय् न्ववायेगु झ्वलय् गुणस्तरहीन सामग्री छ्यःगु लुइवं ताँ दयेकेगु ज्या दिकि धकाः निर्देशन बियां नं प्राविधिक हे मतसे ढलान याःगु खँ कनादिल ।

वय्कलं ताँ दयेकेगु ज्या तत्काल दिकि धकाः लिखित निर्देशन बियां नं निर्देशनयात वेवास्ता यासें चांचां सरकारी प्राविधिकं तकं ताँ ढलान याःगु खँ कनादिल । वय्कलं सिष्टम कथं ढलान यायेगु खःसा मन्त्रालयया प्राविधिक तयाः जक ज्या यायेमाः धासें आः उगु ताँ थुनाः उगु हे कम्पनीं गुणस्तरीय ताँ दयेकीगु खँ कनादिसें उकिया निंतिं कानुनी प्रक्रिया तकं न्ह्याके धुनागु जानकारी नं वय्कलं बियादिल ।

ताँ दयेकेगु ज्या क्वचायेधुंकूसां नं थुगु ताँ प्राविधिक ल्याखं तसकं कमजोर जूगुलिं उगु ताँय् सवारी सञ्चालन यायेगु ज्या पनेत ट्राफिक प्रहरीयात निर्देशन बीधुनागु जानकारी नं वय्कलं बियादिल । तर वय्कलं अथे धाःसां नं ताँय् सवारी साधन धाःसा चले यायेगु ज्या जुयाच्वंगु दु । थुकिया कारणं यानाः अन गुगुं नं इलय् दुर्घटना जुइफइगु सम्भावना दु ।

एसियाली विकास बैंकया त्यासाय् दयेकाच्वंगु ६२ मिटर ताःहाकःगु उगु ताँ दयेकेत २० करोड १३ लाख तका तुइगु खँ धाःगु दु । कम्पनीं २०७४ मंसिरय् दयेकेगु ज्या क्वचायेकेमाःगु खः । तर दछि लिपा जक ताँ दयेकेगु ज्या क्वचायेकूगु खः ।