चिनियाँ दूतावास न्ह्यःने प्रदर्शन

येँ (नेपालभाषा टाइम्स) – हुम्लाय् सीमा अतिक्रमण याःगु धासें येँया बालुवाटारय् च्वंगु चिनियाँ दूतावास न्ह्यःने प्रदर्शन जूगु दु। प्रदर्शकारीपिंसं सीमा अतिक्रमण बन्द यायेमाःगु, मिचे जूगु भूमि लित बीमाःगु पुलांगु सन्धी लागू यायेमाःगु माग यासें प्रदर्शन याःगु खः ।

प्रदर्शनकारीतय्सं ब्याक अफ चाइना च्वयातःगु पम्प्लेट नं प्रदर्शन याःगु खःसा लिपा उमित प्रहरीं लिनाछ् वःया तितरवितर याःगु खः । थ्वहे झ्वलय् छुं न्हि न्ह्यवंनिसे नेपाःया सञ्चार माध्यमय् चिनियाँ पक्ष हुम्लाया नेपाः-चीन सीमा क्षेत्रया नेपाःया भूभागय् भवन दयेकूगु धइगु समाचारयात कयाः येँ च्वंगु चिनियाँ दूतावासं खण्डन याःगु दु ।

चिनियाँ दूतावसया प्रवक्ता वाब सीयओलबं थःगु आधिकारिक धापू सार्वजनिक यासें नेपाः-चीन सीमा क्षेत्रय् दयेकूगु भवन चीनया हे भूभागय् दुगु प्रमाणित जूगु दावी यानातःगु दु। प्रवक्ता वाब धयादी, ‘उगु भवन दयेकूगु थाय्या बारे नेपाली पक्षं हाकनं नं प्रमाणीकरण यायेफइ, चीनं न्ह्याबलें नं नेपाःया सार्वभौमिकता व क्षेत्रीय अखण्डतायात सम्मान याःगु दु।’ प्रवक्ता वाबं चीन व नेपाःया दुथुइ गुगुं नं कथंया भूभाग सम्बन्धय् विवाद मदुगु खँ धयादिसे निगुलिं पक्षं न्ह्याबलें नं सीमा मामिलायात कयाः संवाद यायेफइगु खँ धयादीगु दु ।

छुं न्हिं न्ह्यवंनिसे नेपाःया सञ्चार संस्थां हुम्लाच्वनंगु नेपाः-चीन क्षेत्रय् चिनियाँ पक्षं भवन दयेकेगु समाचार प्रकाशन याःगु खः । वयां लिपा सीमाया वास्तविक रुपय् स्थलगत अध्ययन यायेत हुम्लाया प्रमुख जिल्ला अधिकारी चिरञ्जीवी गिरीया नेतृत्वया पुचः उखे वंगु खः । उगु पुचलं स्थलगत अध्ययन लिपा केन्द्रय् रिपोर्ट छ्वयेधुंकूगु दु। तर नेपाल सरकारं धाःसा उकियात कयाः आः तक प्रतिक्रिया बिउगु मदुनि ।

सम्बन्धित बुखँ

LEAVE YOUR COMMENTS