रक्षामन्त्री चीकेवं सेनाया पृतनापति भेला

येँ (नेपालभाषा टाइम्स) – नेपाली सेनाया पृतनापति सम्मेलन म्हिगः सम्पन्न जुल । आइतवाःनिसें शुरु जूगु थ्व भर्चुयल पृतनापति सम्मेलन म्हिगः समापन जूगु खः । थुकी रक्षा मन्त्री समेत जुयादीम्ह प्रधानमन्त्री केपी शर्मा ओलीं नं ब्वति कयादीगु खः । सेनाया थ्व सम्मेलन वंगु लछि न्ह्यः हे जुइमाःगु खः । तर तत्कालीन रक्षा मन्त्री समेत जुयादीम्ह उपप्रधानमन्त्री ईश्वर पोखरेललिसे प्रधान सेनापतिया स्वापू स्यनाच्वंगु कारणं सम्मेलन हे मयासे तयातःगु खः । सम्मेलनय् रक्षा मन्त्रीं ब्वति कायेमाःगु खः । आः पोखरेलयात रक्षामन्त्री पदं चीकेधुंकाः तिनि सेनां थ्व सम्मेलन याःगु खः । सम्मेलनय् ब्वति कयादीम्ह प्रधानमन्त्री एवं रक्षामन्त्री केपी शर्मा ओलीं कोरोना महामारीया इलय् सेनां याःगु ज्याखँया तारिफ यानादीगु खः । लिसें सेनायात मेगु थप निर्माणया ज्या नं बीगु घोषणा यानादीगु खः ।