वायुप्रदूषणं अन्तर्राष्ट्रिय उडान प्रभावित
येँ (नेपालभाषा टाइम्स)- स्वनिगलय् वायु प्रदुषण अप्वयेवं अन्तर्राष्ट्रिय उडान नं प्रभावित जूगु दु । म्हिगः कतार एयरवेजया जहान भिजिबिलिटी म्हो जुयाः ल्यान्ड यायेमफयेवं निघौ तक सर्गतय् होल्ड यायेमाःगु खः । उकथं हे यक्व हे आन्तरिक उडान नं प्रभावित जूगु खः ।
जंगलय् च्यानाच्वंगु मिं यानाः देय्न्यंकं वायु प्रदूषण तच्वयाच्वंगु दु । वर्षायाम सुरु लिसें जंगलय् मि नइगु अप्वया वयेवं स्वनिगः लिसें देय्न्यंकं वायु प्रदूषण तच्वयावःगु खँ वातावरण विभागं धाःगु दु । स्वनिगलय् च्वंगु फुक्कं वायुप्रदूषण मापन केन्द्रं थनया फय् प्रदूषित क्यनाच्वंगु खँ विभागं धाःगु दु ।
वायु प्रदूषणया कारणं म्हीग स्वनिगः विश्वया हे दकलय् प्रदूषित सहर कथं मापन जूगु खः । म्हिगः स्वनिगः प्रदूषित सहरय् निगूगु थासय् लाःवःगु दु । म्हिगः ९ः३० ताःई तकया फय्या गुणस्तर मापक सूचक (एक्यूआई) कथं स्वनिगः निगूगु प्रदूषित सहर जूगु खः । म्हिगः स्वनिगःया एक्यूआई १९२ दुगु खः । एक्युआई १०० स्वयां अप्वः जुल धाःसा थनया फय् अस्वस्थकर जुइ । एक्यूआई ३०० स्वयां च्वय् थ्यन धाःसा तसकं घातक व ग्यानापुगु जुइ ।
थ्वहे झ्वलय् मौसम विभागं तत्काल नेपालय् तसकं वा वइगु सम्भावना मदुगु खँ धाःगु दु । वा मवयाः स्वनिगः लिसें देय्न्यंकंया वायु प्रदूषण कायम हे जुयाच्वनीगु खँ धाःगु दु । वायु प्रदुषण अप्वयाः मिखा पालुइगु समस्या नं अप्वया वंगु दु ।
मौसमविद्तय् कथं स्वनिगःया वायु प्रदुषण चिला वनेत तसकं वाफय् वयेमाः । प्रदूषण अप्वःगु कारणं विभागं फयांफछि छेँ नं पिहां मवयेत इनाप याःगु दु । पिहां वयेमाःसा माक्स व चश्मा तयाः जक पिहां वयेत इनाप याःगु दु ।
LEAVE YOUR COMMENTS