उपनिर्वाचनया निंतिं तयारी सुरु : कांग्रेस–एमालेया मिखा किपुली

येँ (नेपालभाषा टाइम्स)- स्थानीय तहया उपनिर्वाचन सतिया वःलिसे प्रमुख राजनीतिक दलत थ्व उपनिर्वाचन थःगु पक्षय् लाकेगु रणनीतिक तयारी न्ह्याकूगु दु । निर्वाचन आयोगं थ्व वइगु मंसिर १६ गते ४४ गू स्थानीय तहया पदय् निर्वाचन यायेत्यंगु दु । थुकिया निंतिं मंसिर २ गते उम्मेदवारी दर्ता यायेगु ई क्वःछिनातःगु दु ।

४४ गू थासय् जुइगु उपनिर्वाचनय् २५गू थासय् त्याकेगु रणनीति कांग्रेसया दु । आः उपनिर्वाचन जुइत्यंगु ४४ गू थाय् मध्ये २५गू थासय् न्हापा कांग्रेसं हे त्याकातःगु थाय् खः । किपू नगरपालिकाया मेयर पद लगायत थ्व २५ गुलिं थासय् त्याकेगु निंतिं कांग्रेसं तयारी न्ह्याकूगु खः । कांग्रेसं येँ जिल्लाय् उपनिर्वाचन जुइत्यंगु प्यंगुलिं थासय् त्याकेगु रणनीति दयेकाच्वंसां आःतक उम्मेदवार धाःसा घोषणा याःगु मदुनि ।

येँ जिल्लाय् लाःगु किपू नगरपालिकाया मेयर, १ व ४ वडाया अध्यक्ष लिसें येँ महानगरपालिका १६ वडाय् उपनिर्वाचन जुइत्यंगु दु । किपू नगरपालिकाया मेयर व येँ महानगरपालिकाया १६ वडाय् न्हापा कांग्रेसं हे त्याकातःगु खः । कांग्रेसं विशेष ध्यान बियाच्वंगु किपू नगरपालिकाया मेयरय् उम्मेदवारी बीगु निंतिं कांग्रेस येँ जिल्ला समितिं मदुम्ह मेयर राजकुमार नकर्मीया कलाः जमुना नकर्मी लिसें बद्रीलाल महर्जन, हिमाल कार्की, संगीता बोगटी, शशीर महर्जन, राजमान महर्जन, जनकलाल महर्जन, मीनप्रकाश महर्जन, किरण केसी व सचिन्द्र महर्जनया नां सिफारिस यानातःगु दु ।

मेखे एमालें थ्व उपनिर्वाचनय् २२ गू थासय् त्याकेगु लक्ष्य तयाः न्ह्याः वनाच्वंगु दु । एमालें न्हापा त्याकातःगु गुंगू वडाय् आः उपनिर्वाचन जुइत्यंगु खः । एमालेया नं येँया प्यंगुलिं थासय् त्याकेगु लक्ष्य ज्वनाः न्ह्याः वनाच्वंगु दु । एमालें किपूया मेयरय् विशेष ध्यान बियाच्वंगु सीदुगु दु । एमाले प्रचार विभागया प्रमुख राजेन्द्र गौतमं थुगुसी एमालें उपनिर्वाचन जुइत्यंगु ४४ गू थाय् मध्ये ५० प्रतिशत पदय् त्याकेगु रणनीति दयेकाच्वंगु खँ न्ह्यथँसें थ्व लक्ष्य कथं किपूया मेयरपाखें एमालें विजयी सुरुवात याइगु खँ धयादीगु दु । थ्व पालय् एमाले, कांग्रेस, माओवादी लिसें रास्वपा, राप्रपां गठबन्धन मयासें अलग अलग हे चुनाव ल्वाइगु जूगुलिं नं थःपिं यक्व थासय् त्याइगु दावी गौतमया दु । किपू नगरपालिकाया मेयरया निंतिं एमालें डा. सुरेन्द्र मानन्धरयात थनेगु क्वःछी धुंकूगु दुसा माओवादी केन्द्रं डा. शिवशरण महर्जनयात थनेगु क्वःछीधुंकूगु दु ।

माओवादीं केन्द्रं न्हापा त्याकातःगु च्यागू स्थानीय तहय् आः उपनिर्वाचन जुइत्यंगु दु । माओवादी नं छुं मखुसां थःपिंसं न्हापा त्याकातयागु थासय् थःगु वर्चश्व कायम यायेगु रणनीतिइ दु । मेखे एकीकृत समाजवादी पार्टीं थः याकःचां मफइगु थासय् माओवादी लिसे गठबन्धन यानाः चुनाव ल्वायेगु तयारी यानाच्वंगु दु ।

थुगुसी रास्वपां नं स्थानीय तहया उपनिर्वाचनय् ब्वति काइगु जूगु दु । रास्वपां उम्मेदवार ल्ययेगु निंतिं धाःसा ‘प्राइमरि इलेक्सन’ यायेगु धाःगु खः । थ्व कथं रास्वपां प्राइमरि इलेक्सनया निंतिं कार्यतालिका सार्वजनिक यायेधुंकूगु दु । थ्व कार्यतालिका कथं बुधवाः निसें आइतवाः तक उम्मेदवार जुइ मंदुपिंसं नां दर्ता याकीगु जूगु दुसा २८ गते मतदान याकाः २९ गते नां क्वःछिइगु जूगु दु ।