बामदेवया मुद्दा मोहनी लिपा जक

येँ (नेपालभाषा टाइम्स) – नेपाल कम्युनिष्ट पार्टी (नेकपा) या उपाध्यक्ष बामदेव गौतम विरुद्धया मुद्दाय् आः मोहनि लिपा जक बहस जुइगु जूगु दु। म्हिगः संवैधानिक इजलास च्वने मफयेवं मोहनि न्ह्यः गौतमया मुद्दाय् सुनुवाइ जुइगु सम्भावना मदुगु खः ।

सर्वोच्च अदालतया छुं न्यायाधीश व अधिकृतपिंत कोरोना भाइरस संक्रमण जूगुलिं म्हिगः संवैधानिक इजलास च्वने मफुगु खँ धाःगु दु। वाःया निन्हु बुधवाः व शुक्रवाः जक संवैधानिक इजलास च्वनी । वइगु शुक्रवाः संवैधानिक इजलास च्वनेगु सम्भावना मदुगु खँ सर्वोच्च अदालतं धाःगु दु। गौतमयात नेपाल कम्युनिष्ट पार्टीं राष्ट्रियसभाया दुजः दयेकूगु खःसा उकिया विरुद्ध वरिष्ठ अधिवक्ता दिनेश त्रिपाठी व अधिवक्ता बद्रीराज भट्टं सरकारया निर्णय बदर यायेमाः धकाः माग यासें रिट तःगु खः ।

थ्वहे वंगु असोजया न्हापांगु वालय् सर्वोच्च अदालतं गौतमया राष्ट्रियसभा दुजः पद यथास्थितिइ तयाः मेगु गुगुं नं कथंया जिम्मेवारी मबित अन्तरिम आदेश जारी याःगु खः । गौतमया मुद्दा क्वःमजिउगुलिं यानाः प्रधानमन्त्री ओलीयात मन्त्रिमण्डल पुनर्गठन यायेत नं समस्या जुयाच्वंगु दु। गौतमयात मन्त्रिमण्डलय् हयेगु कथं राष्ट्रियसभाय् यंकूगु खः ।