किपुली नं बुंगद्यः पलिस्था याइगु

यल (नेपालभाषा टाइम्स)÷किपुली पलिस्था यायेगु लागिं यलय् बुंगद्यः दयेकेगु ज्या जूगु दु । किपूया गःछेँय् च्वंगु प्यंगःथां धाःगु थासय् बुंगद्यः पलिस्था यायेत्यंगु खः ।
अन पलिस्था यायेत न्हू दयेकूम्ह बुंगद्यःया मूर्तियात म्हिगः यलया महाबौद्धय् तयाः पुजा याःगु खः । उगु पुज्याय् येँ महानगरपालिकाया मेयर बालेन साहं नं ब्वति कयादीगु खः ।

बुंगद्यःया बाखं कथं बुंगद्यः जात्राया झ्वलय् छन्हु यलया लगं ख्यलं जावलाख्यलय् द्यः सालेत्यंबलय् रथय् द्यः मदुगु जुयाच्वन । गन वन धकाः मालास्वःबलय् वसपोलया किपूया गःछेँय् च्वंम्ह थः यज्जुलिसे च्वनाच्वंगु लानाच्वन । द्यःयात अनं लित हःबलय् वसपोलं दँय्दसं थःगु जात्रा जुइबलय् स्वां छ्वया हये धकाः बचं बियादीगुलिं थौं तक नं किपुली स्वां छ्वयेगु चलन दनि ।

वहे प्यंगः थामय् आः बुंगद्यःया मूर्ति पलिस्था यायेत्यंगु खः । थुकिया लागिं अन आसन नं दयेकातये धुंकूगु दु । अन बुंगद्यःया लिसें वसपोलया यज्जुया मूर्ति नं तइगु खँ धाःगु दु । म्हिगःया किपूमित यलय् वयाः द्यः कयायंकूगु खः । बुंगद्यःया थ्व मूर्ति नेवाः अभियन्ता रवि शाक्यं दयेकादीगु खः ।

सम्बन्धित बुखँ

LEAVE YOUR COMMENTS