कोरोना संक्रमण अप्वल, मछिंगु अवस्थाय् थ्यन : मन्त्रालय

येँ (नेपालभाषा टाइम्स) – कोरोना संक्रमिततय् ल्याः लनीपिं स्वयां अप्वया वःगु दु। म्हिगः न्हिछिया दुने कोरोना संक्रमितत ल्याः ५ हजार ८ म्ह थ्यंगु दुसा कोरोनां लंपिं धाःसा मुक्कं १२२९ म्ह जक दु। म्हिगः खनेदुपिं संक्रमिततय् ल्याः न्हिछिया खनेदुगु आःतकया दकलय् अप्वः ल्याः खः ।

संक्रमिततय् ल्याः अप्वया वयेवं स्वास्थ्य तथा जनसंख्या मन्त्रालयं हे कोरोना संख्या अप्वया वनाच्वंगुलिं तसकं कठीन परिस्थिति वःगु खँ धयादीगु दु। डिस्चार्ज जूपिं स्वयां संक्रमितत जूपिनि ल्याः अप्वःगुलिं यानाः नं मछिंगु अवस्था वःगु खँ मन्त्रालयं धाःगु दु। संक्रमिततय् ल्याः अप्वया वःगु व लंपिं म्हो जूगु कारणं संक्रमिततय्त तयेगु अस्पताल, आइशोलेसनय् तकं समस्या वःगु दु ।

शनिवाः नियमित प्रेस ब्रिफिंगय् स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं अस्पताल, आइसोलेसन सेन्टर थ्यंमथ्यं जायेधुंकूगु खँ धयादीगु दु। वय्कलं धयादीगु दु, ‘विरामी झन झन अप्वया वयाच्वंगु दु। थुकिं झीत तसकं मछिंगु अवस्थाय् यंकाच्वंगु जिमित ताः ।’

शनिवाः थप जूपिं संक्रमिततय् ल्याः लिसें आः तक नेपालय् संक्रमिततय् ल्याः १ लाख ५ हजार ६८४ म्ह थ्यंगु दुसा आःतक डिस्चार्ज जूपिनि ल्याः ७४ हजार २५२ थ्यंगु दु। आः ३० हजार ८१८ म्ह सक्रिय संक्रमितत थ्यनाच्वंगु दु। लिपांगु २४ घन्टा दुने थप १४ म्ह कोरोनाया कारणं सीगु खँ धाःगु दु। थ्व लिसें कोरोनां सीपिनि ल्याः ६१४ म्ह थ्यंगु दु ।

स्वनिगलय् २६७२ म्ह थप
म्हिगः संक्रमित जूपिं मध्ये स्वनिगःयापिं जक बछिं मल्याक लाःगु दु । म्हिगः न्हिछिया दुने स्वनिगलय् २ हजार ६७२ म्ह संक्रमितत लूगु खः । थुकी मध्ये येँय् २ हजार १०० म्ह दुसा यलय् ३६९ म्ह व ख्वपय् २०३ म्ह दु ।