ने. सं. ११४४ कौलाथ्व चौथी -

दिगुख्यः गुथिया स्वीखुक्वःगु दँमुँज्या

येँ(नेपालभाषा टाइम्स)- श्री दिगुख्यः गुथि पकनाय्ज्वःया स्वीखुक्वःगु दँमुँज्या वंगु शनिवाः जुल । गुथिया संरक्षक पुचःया दांभरिं भाइकाजी तुलाधरया सभापतित्वय् थनया नयाँबजाःस्थित मल्टि भेन्युइ उगु दँमुँज्याया उलेज्या नं वय्कलं हे यानादीगु खः ।

दँमुँज्याय् गुथिया छ्याञ्जे विजयरत्न तुलाधरं वार्षिक प्रतिवेदन व दांभरिं गितम तुलाधरं आर्थिक ल्याःचाः न्ह्यब्वयादीगु खः । गुथिया नायः तारावीर सिंह तुलाधरं लसकुस यानादीगु ज्याझ्वलय् गुथिया वेबसाइटया नं उलेज्या याःगु खःसा न्हूपिं कवः थाकुलि मोतिरत्न तुलाधर व सानुराजा तुलाधरयात हनेज्या नं याःगु खः ।

थुकथं हे ज्याझ्वलय् रत्नदेवी तुलाधर, लानीदेवी तुलाधर, नानीहेरा तलाधर, माहिलाकाजी तुलाधर, मणिरत्न तुलाधर, हिरारत्न तुलाधर, पुण्यरत्न तुलाधर, अमूल्यरत्न तुलाधर, पद्मधार तुलाधर, पन्नाकाजी तुलाधर, ताराशोभा तुलाधर, कमलतारा तुलाधर व तुलरत्न तुलाधरपिंत दोसल्ला न्यययेकाः हनापौ देछासे हनेज्या याःगु खः ।

दँमुँज्याया हे झ्वलय् शैक्षिक ख्यलय् उत्कृष्ट ल्याः हयादीपिं विद्यार्थीयात थीथी सिरपाःलिसें छात्रवृत्ति नं लःल्हाःगु खः । अथे हे थुगु दँय् इहिपा यानादीपिं कायमचा, भौमचा, म्ह्यामचा व जिलाजंयात नं भिंतुना देछाःगु खः ।

गुथिया संरक्षण पुचःया नायः मोतिकाजी तुलाधर, संरक्षण पुचःया छ्याञ्जे स्वयम्भूरत्न तुलाधर, निवर्तमान नायः रमेश तुलाधर, मिसा पुचःया नायः पे्रमहिरा तुलाधरं थःथःगु नुगःखँ तयादीगु ज्याझ्वलय् ज्यासना पुचःया न्वकु विद्यासागर तुलाधरं सुभाय् देछानादीगु खः ।