पासा पुचः गुथि युके साउथईष्ट शाखाया न्हय्क्वःगु दँमुँज्या

येँ – पासा पुचः गुथि युके साउथईष्ट शाखाया न्हय्क्वःगु दँमुँज्या वंगु आइतवाः जुल । दँमुँज्याया उलेज्या मूपाहां कथं झायादीम्ह पासा पुचः गुथिया नायः कुमार श्रेष्ठ व साउथईष्ट शाखा नायः सुशील प्रजापतिं मंकाःकथं यानादीगु खः ।

दँमुँज्यां सर्वसम्मतिं सुशील प्रजापतिया नेतृत्वय् झिंन्याम्ह दुजः दुगु न्हूगु कार्यसमिति नं ल्यःगु दु । न्हूगु कार्यसमितिइ न्वकू पदय् माधवलाल श्रेष्ठ, मदन श्रेष्ठ व रिता श्रेष्ठयात ल्यःगु दु ।

अथेहे नगेन्द्र श्रेष्ठ मूछ्याञ्जे, भीमलक्ष्मी शाक्य छ्याञ्जे, विनोद चिपालु सांस्कृतिक छ्याञ्जे, सत्यप्रसाद प्रजापति सह सांस्कृतिक छ्याञ्जे, दुर्गा प्रसाद श्रेष्ठ दांभरी, सोनी श्रेष्ठ लिउदांभरिं ल्यःगु दुसा दुजलय् धनमाया महर्जन, ईश्वर महर्जन, रमेश जोशी, कृष्ठ वैद्य व राजकुमार शाक्य ल्यःग् खः ।

मुँज्याय् पुलांम्ह छ्याञ्जे नगेन्द्र श्रेष्ठं वार्षिक प्रतिवेदन न्ह्यःब्वयादीगु खःसा पुलाम्ह दांभरी बुद्धि श्रेष्ठं आर्थिक प्रतिवेदन न्ह्यःब्वयादीगु खः ।

पासा पुचः गुथि लन्दनया नायः कपिल श्रेष्ठ, न्वकु ओजेस डंगोल, मेम्ह न्वकु जानकी कायस्थ, पासा पुचः गुथि रिडिङ्गया नायः रमेश श्रेष्ठ,
संयुक्त श्रेष्ठ, डा. सचेतन तुलाधर लगायतपिनिगु उपस्थिति दुगु ज्याझ्वलय् नेपाभाषाया पत्रकार मय्जु लक्ष्मी शाक्य व मिसेस नेपाल युनिभर्स त्याकादीम्ह मनिसा डंगोलयात सम्मान याःगु खः ।