ने. सं. ११४६ तछलाथ्व दशमी -

स्वनिगलय् कोरोना संक्रमित अप्वल : आइसीयु व भेन्टिलेटरया अभावं व्यवस्थापन यायेत समस्या

येँ (नेपालभाषा टाइम्स) – स्वनिगलय् कोरोना भाइरसया संक्रमित जुइपिनिगु ल्याः अप्वया वनाच्वंगु दु। तर अस्पतालं उकियात पने फइगु अवस्था मदुगु खँ सीदुगु दु। स्वनिगलय् न्हिथं द्वःछि स्वयां अप्वः मनूत कोरोना भाइरसं प्रभावित जुयाच्वंगु दु। तर माक्व आइसोलेसन सेन्टर मदुगु जक मखुसें आइसीयू व भेन्टिलेटर तकं अभाव जुयाच्वंगु खँ सीदुगु दु ।

देय्न्यंकं संक्रमित जूपिं मध्ये ५५ निसे ६० प्रतिशत स्वनिगःया वासिन्दा दु। तर संक्रमित अप्वया वनेवं उकियात व्यवस्थापन यायेत समस्या जुयाच्वंगु खँ चिकित्सकपिंसं धाःगु दु। कोरोना भाइरस संक्रमणया कारणं यानाः स्वनिगःया अस्पतालं फये मफइ कथंया समस्या जुइधुंकूगु सम्बन्धित चिकित्सकपिंसं धाःगु दु ।

देय्न्यंकया अवस्था स्वयेगु खःसा स्वनिगलय् दकलय् अप्वः जनघनत्व दुसा कोरोना भाइरसया संक्रमण नं तीव्र रुपं अप्वया वनाच्वंगु दु। संक्रमणया ल्याः अप्वया वनेवं उकियात व्यवस्थापन यायेत तकं समस्या जुइफइगु खँ चिकित्सकपिंसं धाःगु दु। स्वास्थ्य तथा जनसंख्या मन्त्रालयया अधिकारीपिनिगु धापू कथं थौंकन्हय् अप्वया वनाच्वंगु संक्रमणया कारण अस्पतालय् माक्वः शड्ढया मदयेधुंकूगु दु। मन्त्रालयया कथं देय्न्यंकं ९३० गू भेन्टिलेटर दुसा आईसीयु २६०० दु। मन्त्रालयया कथं आः तक ५५० गू भेन्टिलेटर कोरोना भाइरस संक्रमितयात फ्यानातःगु दुसा द्वःछिया ल्याखय् आईसीयु फ्यानातःगु दु ।

चिकित्सकतय् कथं थुकथं हे स्वनिगलय् संक्रमण अप्वया वनधाःसा व जनस्वास्थ्याया मापदण्ड पालना याये मफइगु अवस्था वःसा अस्पतालय् सघन उपचारया निंतिं बेड तकं व्यवस्थापन याये मफइगु खँ धाःगु दु ।

थ्वहे झ्वलय् चिकित्सा विज्ञपिसं स्वनिगलय् थुकथं कोराना संक्रमण अप्वया वन धाःसा स्वनिगलय् जक ८०० आईसीयु व १०० भेन्टिलेटरया व्यवस्था यायेमालिगु खँ धाःगु दु। स्वनिगलय् समुदायलय् संक्रमण अप्वया वनाच्वंगुलिं उकियात नियन्त्रण यायेगु निंतिं नं माःगु उपाय नालेत सरकारं असफल जूगु द्वपं नं चिकित्सकपिंसं बिउगु दु ।

चिकित्सकतय् कथं लकडाउन व निषेधाज्ञायात जनतां अस्वीकार यायेधुंकूगु दु। आः मोहनी व स्वन्ति नखः न्ह्यःने वयाच्वंगु दुसा संक्रमित जुइपिनिगु ल्याः नं अप्वया वनाच्वंगु दु। उकिं आः सरकारं माःगु सतर्कता मनालेगु खःसा आपालं जनधनया क्षति जुइफइएगु ख्याच्वः नं बिउगु दु ।