कानुन मन्त्रीया राजीनामा माग

येँ – नेपाली कांग्रेस संसदीय दलं कानुन न्याय तथा संसदीय व्यवस्थामन्त्री शेरबहादुर तामाङयात बर्खास्त यायेत माग याःगु दु ।
बंगलादेशय् चिकित्सा शिक्षा अध्ययन याइपिं नेपाःमि छात्रा बारे याःगु टिप्पणीया विषययात कयाः कांग्रेस संसदीय दलं कानुनमन्त्रीयात बर्खास्त यायेमाःगु माग याःगु खः ।

वंगु शुक्रवाः येँय् ग्वसाः ग्वःगु छगू ज्याझ्वलय् न्ववायेगु झ्वलय् कानुनमन्त्री तामाङं बंगलादेशय् चिकित्सा शिक्षाया सर्टिफिकेट कायेगु निंतिं नेपाःमि छात्रां थःगु शरीर लःल्हायेमाःगु अवस्था दु धइगु टिप्पणी यानादीगु खः । कांग्रेस संसदीय दलं कानुनमन्त्रीया थ्व धापुतिं नेपाः व बंगलादेशया स्वापुतिइ तकं लिच्वः लायेफइगु खँ धाःगु दु ।

अथे हे नेपाली कांग्रेस समर्थित नेपाल महिला संघं नं म्हिगः छगू पत्रकार सम्मेलन यासें यदि कानुन मन्त्री तामाङयात कारवाही मयात धाःसा सतक आन्दोलन यायेगु जुइ धकाः ख्याच्वः बिउगु दु । कांग्रेसया मिसा सांसदतय्सं तकं ब्वति काःगु उगु पत्रकार सम्मेलनय् कानुन मन्त्रीयात सरकारं उचित कारवाही यायेमाःगु माग याःगु दु ।

लिसें नेपाःमि छात्रातय्गु प्रतिष्ठाय् घाः लाइगु अभिव्यक्ति बिउगुलिं मेडिकल कलेज सञ्चालक दुर्गा प्रसाइँयात नं तुरुन्त कारवाही यायेमाःगु माग महिला संघं याःगु दु ।