देउवायात ठाकुर पक्षया नं समर्थन, राजनीतिइ न्हूगु ट्विस्ट

येँ- प्रधानमन्त्री शेरबहादुर देउवायात म्हिगःया प्रतिनिधिसभांय् विश्वासया मत दइगु जूगु दु । वय्कःयात मत बीगु वा मबीगु धइगु खँय् धाःसा एमालेया माधव नेपाल खेमा दुने विभाजन पिहां वःगु खःसां जसपाया महन्थ ठाकुर पक्षं नं वय्कःयात मत बिउगु कारणं बहुमत खाकेगु लागिं समस्या मजूगु खः ।

ठाकुर पक्षया मत वइगु जुइवं प्रतिनिधिसभाय् मतदान जुइ न्ह्यः हे वय्कःयात स्पष्ट बहुमत दइगु संकेत खने दयेधुंकूगु खः । ठाकुर पक्षं मत बीगु जुइवं वय्कःया समर्थनय् १४२ म्ह सांसद थ्यंगु खः ।

प्रतिनिधिसभाय् नेपाली कांग्रेसया ६१, माओवादी केन्द्रया ४८, जनता समाजवादी पार्टीया ३२ व जनमोर्चाया छम्ह सांसद दु । प्रतिनिधि सभाया आःया संरचना कथं विश्वासया मत कायेगु लागिं सरकारयात १३६ मत दुसा गाः ।

प्रधानमन्त्री देउवायात थःपिंसं नं विश्वासया मत बी धकाः जसपाया ठाकुर पक्षं याःगु घोषणायात राजनीतिइ वःगु न्हूगु ट्विस्टया रुपय् काःगु दु । जसपाया थ्व घोषणा लिपा देउवायात माधव नेपाल पुचःया फुक्कं सांसदया मत मवःसां नं बहुमत खाइगु स्पष्ट संकेत पिहां वःगु खः ।
जसपाया ठाकुर पक्षयात प्रम देउवां पौ च्वयाः विश्वासया मत फ्वनादीगु खःसा ठाकुर पक्षं देउवापाखें नं थःपिनि माग पूवंकेगु बचं वःगुलिं विश्वासया मत बीत्यनागु खँ धाःगु दु ।

सम्बन्धित बुखँ

LEAVE YOUR COMMENTS