स्वयम्भूया गुर्जुपिनि छेँ दनेगु शुरु

येँ – २०७२ सालया तःभुखाचं क्षति जूगु स्वयम्भूया गुर्जुपिं च्वनीगु छेँ व विहार पुनर्निर्माणया ज्या न्ह्याःगु दु । गृहमन्त्री रामबहादुर थापां गुर्जुपिं च्वनीगु छेँ व विहारया म्हिगः शिलान्यास यानादीगु खः । १८ करोड तका तुइक विहार व छेँ दयेकेगु ज्या दछिया दुने क्वचायेकेगु आज्जु तयातःगु खँ स्वयम्भू पुनर्निर्माण उपभोक्ता समितिया सभापति ईश्वर बुद्धाचार्यं कनादिल ।
शिलान्यास ज्याझ्वलय् न्ववासें येँ मनपाया प्रमुख विद्यासुन्दर शाक्यं सम्पदा पुनर्निर्माण यायेत महानगर प्रतिबद्ध दुसां थीथी निकायं पंगः थंगुलिं माक्व बजेट विनियोजना जुइधुंकाः नं गति काये मफुगु खँ कनादिल ।
ज्याझ्वलय् येँ क्षेत्र नम्बर ७ या सांसद रामवीर मानन्धर, येँ मनपा १५ वडाया वडाध्यक्ष ईश्वरमान डंगोलपिंसं नं न्ववानादीगु खः ।