ने. सं. ११४४ ञलाथ्व पुन्हि - येँया: पुन्हि

यल मनपाया खोज, उद्धार व प्राथमिक उपचार तालिम

यल – यल महानगरपालिकाया ग्वसालय् स्वन्हुयंकं जूगु खोज, उद्धार व प्राथमिक उपचार आवासीय तालिम क्वचाल । यल मनपा विपद् व्यवस्थापन समितिया ग्वसालय् उगु तालिम सशस्त्र प्रहरी बलया विपद् व्यवस्थापन केन्द्र कुरिनटारय् जूगु खः । तालिम समापन ज्याझ्वलय् प्रशिक्षक व प्रशिक्षार्थीपिंत दसिपौ लःल्हाःगु खः ।यल मनपाया उपप्रमुख गीता सत्यालया सभापतित्वय् जूगु तालिम समापन ज्याझ्वलय् नवाःपिंसं तालिमय् प्राप्त ज्ञान, शीप व क्षमतायात व्यवहारय् नं प्रयोगय् हयेमाःगु खँय् बः बिउगु दु ।ज्याझ्वलय् तालिमया संयोजक नापं वडा नं. १६ या वडाअध्यक्ष निर्मलरत्न शाक्यं तालिमया अवधिइ थःगु हे छेँजःपिंलिसें च्वनागु अनुभूति जूगु धासें तालिम कयादीपिं सकलें सहभागितय्सं वडास्तरया विपद् व्यवस्थापन समितियात प्रभावकारी रुपं कार्यान्वयनय् हयेत इनाप यानादिल ।अथे हे वडा नं. ३ या वडाअध्यक्ष गोपाल महर्जनं तालिम कयादीपिंसं वडास्तरय् जुइगु ज्याय् थःपिंसं कयादीगु तालिमयात कार्यान्वयन हये फत धाःसा जक वास्तविक धन्यवादया पात्र जुइ धयादिसें मनपाय् दँय्दसं ६० लाखया विपद व्यवस्थापन बजेट दुगु जानकारी बियादिल ।

सहभागितय्पाखें वडा नं. ३ या रञ्जु प्रणामी व वडा नं. ५ या कृष्ण रिजालं तालिमय् थःपिंसं सयेकागु खोज व उद्धारया व्यवहारिक व प्राविधिक ज्ञान जीवनोपयोगी जूगु विचाः तयादीगु खः ।समापन ज्याझ्वःया मूपाहां नापं तालिम केन्द्रया समादेश वरिष्ठ प्रहरी उपरीक्षक ई. प्रजाभक्त श्रेष्ठं थुकथंया तालिम कायेत स्वलाया ई काइगु खःसां मनपाया इनापय् परिचयात्मक तालिमया व्यवस्था यानागु जानकारी बियादिल । स्वन्हुया दुने हे दक्वं सयेका धइगु तायेकामदीत इनाप यासें सैद्धान्तिक स्वयां प्रदर्शनात्मक तरिका नालाः केन्द्रया उत्कृष्ट प्रशिक्षकपाखें प्रशिक्षणया व्यवस्था मिले यानागु वय्कलं धयादिल ।ज्याझ्वःया सभापति नापं उपप्रमुख सत्यालं विपद व्यवस्थापनया निंतिं दक्वं वडाय् खुम्ह दक्ष ल्याय्म्हतय् पुचः दयेकेगु उद्देश्यं तालिमया व्यवस्था यानागु जानकारी बियादिल ।तालिम समापनय् मूपाहां श्रेष्ठ व उपप्रमुख सत्यालं प्रशिक्षार्थीतय्त दसिपौ लःल्हानादीगु खःसा मनपापाखें मूपाहां लगायत तालिम बियादीपिं सशस्त्र प्रहरीया अधिकारीतय्त मतिनाया चिं लःल्हानादीगु खः । तालिमय् ११ गू वडाया पीम्हेसिया सहभागिता दुगु खः ।