साहित्यिक पत्रपत्रिका वर्गीकरणय् सरल मापदण्ड

येँ – प्रेस काउन्सिल नेपालं साहित्यिक पत्रपत्रिका वर्गीकरणया निंतिं सरल मापदण्ड तयार याःगु दु । प्रेस काउन्सिल नेपालं साहित्यिक पत्रपत्रिका वर्गीकरणया निंतिं बिस्कं मूल्यांकन मापदण्ड तयार याःगु खः । थ्व झ्वलय् काउन्सिलं सरोकारवालातलिसें सहलह नं याःगु दु । काउन्सिलं साहित्यिक पत्रिका मूल्यांकन मापदण्ड मस्यौदायात कयाः नेपाल साहित्यिक पत्रकार संघया पदाधिकारीलिसें वरिष्ठ साहित्यिक पत्रकारलिसें सहलह याःगु खः ।

सहलहया इलय् मूलधारया पत्रपत्रिका स्वयां साहित्यिक पत्रपत्रिक विशेष प्रकृतिया जुइगुलिं बिस्कं मूल्यांकनया निंतिं मापदण्ड हयागु काउन्सिलं न्ह्यथंगु दु । साहित्यिक पत्रपत्रिकायात वर्गीकरणया इलय् बीगु अंक मेमेग पत्रपत्रिकायात बीगु ल्याः स्वयां अप्वः जुइकथंया मापदण्ड तयार यानागु काउन्सिलया दुजः चेतनाथ धमलां जानकारी बियादिल ।

ताःई न्ह्यवनिसें भाषा, साहित्य, संस्कृति, संगीत व कला क्षेत्रयात पत्रकारिताया माध्यमं योगदान बीगु व नियमित रुपं पिहां वयांच्वंगु लय्पौ, स्वला पौ थेंज्याःगु साहित्यिक पत्रपत्रिकायात झन्झट मजुइकथंया मापदण्ड काउन्सिलं तयार याःगु खः । ताःई न्ह्यवंनिसें सरकारी व निजीस्तरं नियमित रुपं साहित्यिक पत्रपत्रिका पिथनेगु याना वयाच्वंगु दु ।