लानिपुखूया देगलय् गजू छुइगु स्थगित

येँ (नेपालभाषा टाइम्स) – लानिपुखुली च्वंगु बालेश्वर महाद्यःया देगलय् म्हिगः गजू छुइगु ज्या मजुल । पुनर्निर्माण प्राधिकरणं म्हिगः गजू छुइगु ज्याझ्वः तयातःगु खःसां म्हिगः द्वादशी जूगु कारणं साइत मदुगु धासें पूजा याइम्ह गुर्जुं म्हिगः क्षमा पुजा यायेगु पाय्छि मजू धाःगुलिं म्हिगः जुइमाःगु पुजा मजूगु खँ प्राधिकरणया इन्जिनियर राजु मानन्धरं ‘नेपालभाषा टाइम्स’ यात कनादीगु दु ।

वय्कलं थःपिंसं गजू छुइगु ज्या यायेगु तयारी यानागु खःसां नं गुर्जुं मिले मजू धाःगु कारणं गजू छुइगु ज्या मजूगु खँ कँसें कंस बिहीवाः पुन्हि कुन्हु साइत बिउगुलिं विहीवाः गजू छुइगु ज्या जुइगु जानकारी बियादिल । गजुली लुं सीगु निंतिं दरवार हाइस्कुलया छकू क्वथा कयाः लुँ सीगु ज्या जुयाच्वंगु दु । गजुली लुं सीगु निंतिं जक ३८ तोला लुँ मालिगु खँ धाःगु दु ।

वय्कःया कथं मलमासया कारणं छुं नं कथं पुजा याये मजिउगुलिं क्षमा पुजा जक यानाः गजू छुइगु ज्या जुइ । वयां लिपा मलमास क्वचायेवं राष्ट्रपति विद्यादेवी भण्डारीपाखें उलेज्या यानाः लानिपुखू पुनर्निर्माणया ज्या क्वचाःगु घोषणा जुइ ।