कोरोना भ्याक्सिन परीक्षणया प्रस्ताव : नेपालं स्वंगूगु चरणया वासः परीक्षण याके बीगु

येँ (नेपालभाषा टाइम्स) – विश्वन्यंकं महामारी जुयाः न्यना वनाच्वंगु कोरोना भाइरसया वासः दयेकेगु लागिं कुतः यानाच्वंपिं थीथी देतय्सं थःपिंसं दयेकागु वासःया परीक्षण यायेगु लागिं नेपाःयात प्रस्ताव छ्वया हयाच्वंगु खँ सीदुगु दु। स्वास्थ्य मन्त्रालय सूत्रं धाःकथं आः तक नेपाःयात चीन, अष्ट्रेलिया, क्यानाडा, रुस व बेलायतपाखें वासः परीक्षणया प्रस्ताव छ्वया हयेधुंकूगु दु । तर नेपालं आः तक छुं नं देययात लिसः धाःसा मबिउनि।

कोरोनाया वासः गनं नं दयेकल धाःसा उकिया परीक्षण यायेगु लागिं विश्वया थीथी देय्तय्त ग्वाहालिया लागिं संयुक्त राष्ट्र संघं नं आह्वान याना तयेधुंकूगु दु। उकिं ग्वाहालि यायेगु लागिं नेपाः तयार जुयाच्वंगु दु। तर नेपालं अज्याःगु वासः (भ्याक्सिन) या स्वंगूगु चरणया परीक्षण जक नेपालय् याके बीगु खँ स्पष्ट यायेधुंकूगु दु। परीक्षणया अनुमति बीगु ज्या धाःसा नेपाः सरकारं हे निर्णय याकाः जक क्वःछी । स्वास्थ्य मन्त्रालय याकःचां अज्याःगु निर्णय याये मफइगु खँ नं सूत्रं धाःगु दु ।

कोरोनाया भ्याक्सिन परीक्षण प्यंगू चरण तक याइगु ग्वसाः दु। थुकिया न्हापांगु चरणय् ल्याबय् हे परीक्षण जुइसा अनं ठीक जुल धइगु निश्चित जुइवं छुं मनूतय्त परीक्षण याना स्वइ । उकी बांलाःगु लिच्वः वल धाःसा निगूगु चरण कथं फरक उमेर, लिंग, जाति आदिया निसः स्वसः मनूतय्त परीक्षण याना स्वइ । उकी नं ठीक जुल धाःसा थीथी देशय् यंकाः द्वलंद्वः मनूतय् दथुइ उकिया स्वंगूगु चरणया परीक्षण जुइ ।

स्वंगूगु चरणय् नं लिच्वः बांलाःगु वल धाःसा आम रुपं परीक्षण याइ । नेपालं स्वीकृति बिउगु स्वंगूगु चरणया परीक्षण खः । थौंकन्हय् रुस, चीन, क्यानाडा आदि देशं दयेकाच्वंगु कोरोनाया भ्याक्सिन निगूगु चरण पार यानाः स्वंगूगु चरणय् थ्यनेधुंकूगु दु। थ्व देतय्सं स्वंगूगु चरणया परीक्षण यायेगु लागिं हे नेपाःयात इनाप याना हःगु खः ।

सूत्रं बिउगु जानकारी कथं अष्ट्रेलियां छ्वया हःगु प्रस्तावय् गुपिं मनूतय्त वासःया परीक्षण यायेगु खः उकिगु जीवन बीमा समेत थःपिंसं व्यहोरे यायेगु खँ न्ह्यथनातःगु दु। तर अज्याःगु परीक्षण याःगु वापत परीक्षण याके बिउम्ह मनू व राज्ययात छु फाइदा दइ धइगु खँ धाःसा स्पष्ट याःगु मदुनि । फाइदा बेफाइदाया खँ छुं हे देतय्सं स्पष्ट मयाःगु कारणं नेपालं सुंलिसे नं औपचारिक वार्ता न्ह्याकूगु मदुनि, तर फुकलिसे सम्पर्क तयेगु ज्या धाःसा यानाच्वंगु खँ धाःगु दु ।

सम्बन्धित बुखँ

LEAVE YOUR COMMENTS