अनिवार्य मातृभाषा शिक्षाया निंतिं मागपत्र दर्ता

येँ – अनिवार्य मातृभाषा शिक्षाया माग यासे मागपत्र लःल्हाःगु दु । मातृभाषा शिक्षा जनस्तर अभियानं उकथं अनिवार्य मातृभाषा शिक्षाया व्यवस्था यायेमाःगु माग यासे शिक्षा मन्त्रालययात मागपत्र लःल्हाःगु खः ।

मातृभाषा शिक्षा माग यासे मन्त्रालयय् मागपत्र लःल्हायेगु झ्वलय् वंगु फागुन ९ गते विश्व मातृभाषा दिवसया थनया असनय् जूगु ज्याझ्वलय् मुंकूगु ल्हाःचिंयात नं शिक्षामन्त्रीया ध्यानाकर्षण यासें दर्ता याःगु खः।

मागपत्रय् नेपाःया संविधानं नेपाःया दक्वं राष्ट्रभाषां शिक्षा काये दइगु अधिकारया व्यवस्था यानातःगु, संघीय संसदं नं दक्वं मांभासं शिक्षा काये धइगु विधेयकयात अनुमोदन यायेधुंकूगु अवस्थाय् शिक्षा मन्त्रालय अन्तर्गतया पाठ्यक्रम विकास समितिं दयेकूगु पाठ्यक्रमय् खस् नेपाली भाय् ब्वनेगु व्यवस्था याःगु धासें असहमति प्वंकातःगु दु ।

नेपालय् आदिकालंनिसें ल्हाना वयाच्वंगु दक्वं मांभाय् नेपाली हे जूगु व भाषा आयोगं नं कामकाजीया मान्यता बीगु क्रमय् दुगु मातृभाषायात शिक्षाय् थाय् बीमाःगु व खस् आर्य लगायत मेमेगु मांभाय्यात नं थःथःगु भासं अनिवार्य ब्वने दयेमाःगु व्यवस्था यायेत मागपत्रय् धयातःगु दु ।

जनकवि दुर्गालाल श्रेष्ठ, भाषासेवी लक्ष्मीदास मानन्धर, नेवाः न्ह्यलुवा मल्ल के. सुन्दर, पुलांम्ह राज्यमन्त्री तीर्थराम डंगोल, नांजाःम्ह वरिष्ठ म्येँ हालामि भृगुराम श्रेष्ठ लगायतया भाषा आन्दोलनया न्ह्यलुवापिनिगु ल्हाःचिं दुगु उगु मागपत्र अभियन्तापिं देवदास मानन्धर, रविन्द्रप्रसाद श्रेष्ठ लगायतया पुचलं वंगु फागुन २२ गते मन्त्रालयय् दर्ता यानाथकूगु खः ।