मधेसीया पहिचान छु ?

येँ – देशय् मधेसी समुदायया नामय् ततःधंगु आन्दोलन जुयाः सत्ताय् थ्यनेगु ज्या समेत जुइ धुंकाः तराई–मधेस लागाय् च्वंपिं छु छु जाति मधेसी खः, छु छु मधेसी मखु छुटे यानाः पहिचान स्पष्ट यायेमाःगु माग जूगु दु । मधेसी आयोगया याकःचाम्ह अध्यक्ष विजयकुमार दत्तं म्हिगः राष्ट्रपति विद्या भण्डारी समक्ष आयोगया वार्षिक प्रतिवेदन लःल्हासें थ्व खँ ल्ह्वनादीगु खः ।

आयोगया प्रतिवेदनय् नं थ्व खँ न्ह्यथनातःगु दु । आयोगं ज्या यायेगु क्षेत्राधिकार मिथिला, अवध व भोजपुरा क्षेत्रय् लाः तर उगु क्षेत्रया छु जाति मधेसी खः छु मखु धइगु खँ आः तक स्पष्ट मजूगुलिं थ्व खँ निर्धारण याना बीमाःगु माग नं आयोगं याःगु दु ।

आयोगया अध्यक्ष दत्तं थ्व विषयय् सहलह यायेत थीथी विज्ञत लिसे १०० गू बैठक च्वनेधुंकूसां आः तक मधेसीया पहिचान स्पष्ट मजूनि धासें मधेस लागाय् च्वंगु थीथी जाति मध्ये छु छु मधेसी खः धकाः सूचीकृत याना बीमाःगु माग नं प्रतिवेदनय् याना तःगु दु । वय्कलं धयादी, ‘मधेस दुने हे नं मधेसीतय्त पहिचानया समस्या दु ।

अन दलित, अल्पसंख्यक व विपन्न वर्ग धकाः थीथी पुचः दुगु जुयाः उमिगु पहिचान स्पष्ट यायेमाःगु अवस्था दु ।’ मधेस दुने थौंकन्हय् रैथाने मधेसी समुदायं पिनें वःपिं ‘मधेसी’तय् कारणं थःपिं अल्पमतय् लानाच्वन धकाः दुःख प्वंकाच्वंगु जुयाः उमिगु मागयात नं सम्बोधन यायेमाःगु खँ नं अध्यक्ष दत्तं कनादिल ।

मधेसीया पहिचान भूगोलया लिधंसाय् मखुसें नश्ल, पैतृक पहिचान व वंशानु–गत आधारय् जुइमाः धकाः सुझाव वयाच्वंगु जानकारी नं वय्कलं बियादिल । वय्कलं आः वइगु जन–गणनाया इलय् नं थुकियात ध्यान बीमाःगु खँय् बः बियादिल ।