सभामुखया कार्यकाल विवाद
येँ (नेपालभाषा टाइम्स)÷राष्ट्रिय सभाया अध्यक्ष गणेशप्रसाद तिमिल्सिनां सभामुख व उपसभामुखया पदावधि खुले यायेत निर्वाचन आयोगयात पौ च्वःगु खँ सीदुगु दु । निर्वाचन आयोगं मंसिर ४ गतेया निर्वाचनया नितिं बन्द सूची कायेधुंकाः अध्यक्ष तिमिल्सिनां उगु पौ च्वःगु खँ सीदुगु खः ।
समानुपातिकया बन्दसूची असोज २ गते दलतय्सं निर्वाचन आयोगय् बुझे यायेवं प्रतिनिधिसभा व प्रदेशसभाया दुजःपिनि कार्यकाल क्वचाःगु व्याख्या निर्वाचन आयोगं यायेधुंकूगु दु । तर सभामुख व उपसभामुखं प्रत्यक्षया उम्मेदवारी दर्ता मजूतले थःपिनिगु कार्यकाल ल्यनाच्वनी धायेगु यानाच्वंगु दु ।
राष्ट्रियसभा अध्यक्ष तिमिल्सिनाया निजी प्रमुख निर्वाचन आयुक्तयात च्वःगु पतिइ धयातःगु दु, ‘प्रतिनिधिसभाया पदाधिकारी व दुजःपिनिगु कार्यकाल गबले तक दइ खुले यानाः छ्वयाहयेत निवर्देशानुसार इनाप दु ।’
थ्वहे झ्वलय् म्हिगः सर्वोच्च अदालतं सभामुख व उपसभामुखया पदावधि गबले तक दइ धइगु विषयय् लाःगु रिटय् सर्वोच्च अदालतं कारण देखाउ आदेश जारी याःगु दु । अधिवक्तापिं किशोर पौडेल, जगन्नाथ दुलाल व अनुपम भट्टराईं दायर याःगु रिटया सुनुवाइ यासें न्यायाधीश हरिप्रसाद फुयालं थ्व आदेश बिउगु खः ।
सभामुख अग्निप्रसाद सापकोटा व उपसभामुख पुष्पा भुसालया कार्यकाल क्वचाःगु तर पदीय हैसियतं च्वनाच्वंगु धासें पदमुक्त यायेगु नितिं अन्तरिम आदेश माग याःगु खः । तर अदालतं अन्तरिम आदेश धाःसा जारी मयाः ।
सर्वोच्चं संविधानया धारा ९१ या उपधारा ६ (क) या व्यवस्था आकर्षित जुइगु वा मजुइगु धइगु सम्बन्धय् व्याख्या यायेमाःगु खनेदुगुलिं व थ्व सम्बन्धय् निवेदकयात अपूरणीय क्षति जुइगु अवस्था विद्यमान खने मदुगुलिं निवेदकया माग कथं अन्तरिम आदेश जारी यायेम्वाःगु खँ धाःगु खः ।
थ्वहे झ्वलय् निर्वाचन आयोगं राष्ट्रियसभा अध्यक्ष तिमिल्सिनायात नं प्रतिनिधिसभाया कार्यकालआयोगं निश्चित यायेगु विषय मखु धकाः लिसः च्वया छ्वःगु दु । वंगु शुक्रवाः हे आयोगं छ्वःगु पतिइ धयातःगु दु, ‘निर्वाचित संसदया कार्यकाल आयोगं निश्चित यायेगु मखुसें नेपाःया संविधान व प्रचलित कानुन नापं वंगु ईया अभ्यास कथं निश्चित जुइ ।’
उकथं हे आयोगं प्रतिनिधिसभाया पदाधिकारी व दुजःपिनिगु कार्यकाल क्वःजीमा धासें धयातःगु दु, ‘नेपाल सरकारं प्रतिनिधिसभा दुजः व प्रदेशसभाया दुजःपिनिगु निंतिं निर्वाचनया मिति क्वःछिनाः मतपत्र तकं छापे यानाः निर्वाचनया सघन रुपय् तयारी यानाच्वंगु सन्दर्भयात समेत आधार दयेकाः प्रतिनिधिसभाया पदाधिकारी व दुजःपिनिगु कार्यकाल क्वःजीमा धइगु आयोगया मत दु ।’
उकथं हे अध्यक्ष तिमिल्सिनायात छ्वःगु पतिइ निर्वाचनया निंतिं समानुपातिक निर्वाचन प्रणाली कथं उम्मेदवारया बन्दसूची पेश याःगु छन्हु न्ह्यः तक जक व्यवस्थापिका संसद कायम जुइगु न्हापाया अभ्यास दुगु खँ नं न्ह्यथनातःगु दु ।
LEAVE YOUR COMMENTS