पशुपति विकास गुरुयोजनाया हचुवा प्रस्ताव

पशुपतिया शवदाह गृह चीकेमाः

येँ (नेपालभाषा टाइम्स) – पशुपति क्षेत्रय् छुं दँ न्ह्यः तिनि दयेके सिधःगु विद्युतीय शवदाह गृह आः अनं चीकाः मेथाय् तयेमाःगु प्रस्ताव पशुपति विकास कोषं याःगु दु ।

कोषपाखें नकतिनि सार्वजनिक याःगु विवादास्पद न्हूगु गुरुयोजनाय् थ्व प्रस्ताव यानातःगु खः । सञ्चालन जूगु झिदँ हे मदुनिगु विद्युतीय शवदाह गृह अनं चीकाः पारीपाखे तयेमाःगु प्रस्ताव समेत न्ह्यथनाः उगु गुरुयोजना तयार याःगु खः । गुरुयोजनाय् शवदाह गृहयात अनं चीकाः मेथाय् तयेगु व आः शवदाह गृह तयातःगु थासय् बहुतल्ले पार्किङ भवन दयेकेगु धकाः प्रस्ताव यानातःगु दु ।

गुरुयोजनाय् यानातःगु थज्याःगु प्रस्तावं यानाः थ्व योजना गुलि हचुवा धइगु सी दुगु खँ विकास कोषया पुलांपिं पदाधिकारीतय्सं धाःगु दु। कोषं पशुपति लागाया विकास यायेगु धकाः न्हूगु गुरुयोजना सार्वजनिक यायेवं स्थानीय मनूतय्सं उकिया विरोध याःगु खः । गुरुयोजनाय् थनया मुक्कं वस्ती थनाः अन पशुपतिलिसे स्वापू दुगु लज, होटेल आदि निर्माण यायेगु प्रस्ताव यानातःगु खः । थुकिया विरोधय् स्थानीय जनतां सः तयेवं सरकारं छगू कार्यदल गठन यानाः आन्दोलनकारीत लिसे वार्ता न्ह्याकूगु खः ।

म्हिगः नं उगु कार्यदल व आन्दोलनकारीतलिसे खँल्हाबंला जूगु खः । तर उकिं छुं लिच्वः धाःसा पिहां मवःगु खँ धाःगु दु। थ्वहे झ्वलय् पशुपति विकास कोषं उगु गुरुयोजना पारित याःबलय् उगु बैठकय् सम्बन्धित मन्त्रालयया मन्त्री, सचिव, पुरातत्व विभागया पदाधिकारी लिसें सुं विज्ञत नं मदुगु खँ सीदुगु दु। मन्त्रीया स्वकिय सचिवयात न्ह्यःने तयाः गुरुयोजना पारित याःगु खः ।

गुरुयोजनाया थासय् न्हूगु योजना
पशुपति विकास कोषया न्हूगु गुरुयोजना विवादय् लायेवं आः उकिया थासय् अन न्हूगु हे गुरुयोजना लागू याकेगु बारे खँल्हाबंला जुयाच्वंगु सीदुगु दु। आः पिहां वःगु गुरुयोजनायात सरकारया सम्पत्ति कथं सुरक्षित यानाः अन न्हूगु हे गुरुयोजना लागू याकेत सरकारया उच्चपदस्थ मनूत च्वनाः न्हूगु योजना दयेकूगु खँ सूत्रं धाःगु दु। आः तयार याइगु न्हूगु योजनाय् अन च्वंगु स्थानीय जनताया छेँ छखा हे मथुनेगु व सुयातं विस्थापित मयाइगु खँ स्पष्ट यानातःगु दु। तर पशुपति क्षेत्रयात व्यवस्थित रुपं विस्तार यायेगु ज्या धाःसा जुइ धाःगु दु। थ्व न्हूगु योजना कथं विस्तारित जुइगु पशुपति लागाय् नेवाः शैलीं छेँ दने माःगु, स्थानीय जनतायात लाभान्वित जुइ कथं होमस्टे चायेकेगु थेंज्याःगु ग्वसाःत दुथ्याःगु खँ नं धाःगु दु ।