प्रम विरुद्ध अःखतं न्यासि वनाः प्रदर्शन

येँ (नेपालभाषा टाइम्स) – प्रधानमन्त्री केपी शर्मा ओलीं संसद विघटन याःगु विरोधय् नेपाली कांग्रेसया भातृ संगठन नेपाल विद्यार्थी संघं थौं अःखतं न्यासि वनाः प्रदर्शन याइगु जूगु दु। थौं न्हिनय् १ बजे फिब्व ख्यलय् अःखतं न्यासि वनाः विरोध प्रदर्शन यायेत्यंगु खः । आन्दोलनया बारे जानकारी बिसें संघया महामन्त्री बलदेव तिमिल्सनां ओलीया संसद विघटनया पलाः असंवैधानिक जूगुलिं थःपिंसं चरणवद्ध आन्दोलन यानाच्वनागु जानकारी बिउगु दु। वय्कलं प्रधानमन्त्रीं संसद पुनर्स्थापना मयाःतले आन्दोलन जारी जुइगु खँ नं धयादीगु दु ।

उकथं हे म्हिगः प्रधानमन्त्री ओलीं संसद विघटन याःगु विरोधय् नेकपा प्रचण्ड-नेपाल पुचःया विद्यार्थी संगठन अनेरास्ववियुं मीन भवन व प्रदर्शनी मार्गय् प्रम ओलीया पुत्ला च्याकूगु दु। विद्यार्थीतय्सं पुत्ला च्याकेवं प्रहरीं हस्तक्षेप यानाः पुत्ला लाकेगु ज्या जूगु खःसा उकियात पनेगु निंतिं प्रहरीं लाठिचार्ज याःगु खः । उकथं हे संसद विघटनया विरोधय् नेकपाया विद्यार्थी सगठनं म्हिगः देय्न्यंकं हे प्रमया पुत्ला च्याकूगु खः ।

सम्बन्धित बुखँ

LEAVE YOUR COMMENTS