पुखू पुनःनिर्माण यायेत विज्ञलिसे सहलह

किपू (नेपालभाषा टाइम्स) – किपू नगरपालिका वडा नं.३ स्थित मभिं पुखू पुनःनिर्माण विषययात कयाः सहलह जुल । किनपा वडा नं. ३या ग्वसालय् पुखूया पुनःनिर्माण विषययात कयाः सम्बन्धित विज्ञतलिसें परामर्श व सहलह जूगु खः ।

उगु वडाय् च्वंगु ऐतिहासिक व पुरातात्विक महत्वया स्वंगू पुखू पुनःनिर्माण यायेगु ज्या जुयाच्वंगु सन्दर्भय् किपूया सहीदपिनिगु झ्वाता तयातःगु पुखूया पुनःनिर्माण यायेगु सम्बन्धय् उगु सहलह जूगु खः ।

सहलहया झ्वलय् किपू नगरपालिकाया प्रमुख रमेश महर्जनं ऐतिहासिक व पुरातात्विक महत्वया ज्या यायेबलय् विषय विज्ञतलिसे परामर्श व सहलह यानाः यायेमाः धयादिल । वय्कलं वइगु दिनय् नं उकथं हे विकास निर्माणया ज्यायात प्राथमिकता बिया वनेगु खँय् बः बियादिसें नगरपालिकां याना वयाच्वंगु विकास निर्माणया ज्यात परिणामुखी जूगु धयादिल । विशेष यानाः ऐतिहासिक, सांस्कृतिक, धार्मिक व पुरातात्विक महत्वया ज्या यायेबलय् नगरवासीं प्रत्यक्ष अनुभूति यायेकथंया ज्या जुयाच्वंगु नं धयादिल ।

इतिहास व पुरातत्व विज्ञतय् सहभागिता दुगु ज्याझ्वलय् वय्कःपिंसं पुनःनिर्माण न्ह्यः विज्ञतलिसे सहलह यायेगु ज्याझ्वः तःगुलिं किपू नगरपालिका व वडायात सुभाय् बियादीगु खः । ज्याझ्वः वडाअध्यक्ष राजेन्द्र महर्जनया सभापतित्वय् जूगु खः।

सम्बन्धित बुखँ

LEAVE YOUR COMMENTS