मेलम्चीया लः खुलाया दुने वितरण जुइ

येँ – खानेपानी मन्त्री विना मगरं खुलाया दुने स्वनिगलय् मेलम्चीया लः वितरण शुरु जुइगु धयादीगु दु । मन्त्रालयं थौंकन्हय् त्वनेगु लःया सम्बन्धय् अल्पकालीन व दीर्घकालीन ज्याझ्वः नं दयेकाच्वंगु धयादीगु दु । काठमाडौं उपत्यका खानेपानी व्यवस्थापन बोर्डया झिंस्वक्वःगु वार्षिकोत्सव उलेज्याझ्वलय् नवासें मन्त्री मगरं उगु खँ धयादीगु खः ।

वय्कलं राजधानी लगायत देय्या प्रमुख सहरय् खने दयाच्वंगु त्वनेगु लःया समस्या ज्यंकेत सरकारं कुतः यानाच्वंगु व उकिया निंतिं सम्भावित ज्याझ्वःत दयेकेगु ज्या जुयाच्वंगु धयादिल । स्वनिगःया हकय् मेलम्चीया लः वइगु खुलाया दुने छेँखा छेँखाय् वितरण यायेगु शुरु जुइ धासें मेलम्चीया लः वितरण शुरु जुइवं स्वनिगलय् खने दयाच्वंगु त्वनेगु लःया समस्या नं समाधान जुइ धयादिल ।

मेलम्चीया लः वितरण शुरु जुइवं प्यघौ तक लः वितरण याये फइगु अनुमान जुयाच्वंगु धासें वय्कलं धयादिल, ‘१७ करोड लिटर मेलम्चीया लः स्वनिगःया फक्व यक्व थासय् थ्यंगु मन्त्रालयया लक्ष्य दु ।’ज्याझ्वलय् मन्त्रालयया सचिव कृष्णराज बिसीं मेलम्चीया लःयात व्यवस्थित रुपं स्वनिगलय् वितरण यायेगु जक मखसे गुलि फु उलि यक्व छेँखाय् वितरण यायेगु कथंया तयारी जुयाच्वंगु जानकारी बियादिल ।

ज्याझ्वलय् बोर्डया कार्यकारी अध्यक्ष नापं खानेपानी तथा ढल निकास विभागया महानिर्देशक तेजराज भट्ट, कार्यकारी निर्देशक संजीवविक्रम राणा लगायतं स्वनिगलय् खने दयाच्वंगु त्वनेगु लःया समस्या समाधानया निंतिं दीर्घकालीन रुपं याङ्री व लार्केयात नं सफल रुपं स्वनिगलय् हयेमाःगु विचाः तयादीगु खः ।

लुमंकेबहजू, वंगु छुं दिं न्ह्यः जक मेलम्चीया लः हयेगु निंतिं म्हुयाच्वंगु सुरुङया ब्रेक थ्रु जूगु खः । मेलम्चीया निंतिं आवश्यक सुरुङ म्हुइगु ज्या क्वचाःसां सुरुङ दुनेया ज्या धाःसा अझं ल्यं दनि ।