बुंगद्यः बुंगय् लितबिज्याकल

यल – बुंगद्यःयात थौं सोमवाः बुंगय् लित बिज्याकूगु दु । थौं न्हिनय् सवा १ बजे पाखे साइट कथं बुंगद्यःयात रथं कुहां बिज्याकाः खटय् तयाः कुबियाः बुंगय् बिज्याकूगु खः ।

थुगुसी कोरोना महामारीया कारणं बुंगद्यःया जात्रा मजुइवं पुल्चोकया सोह्रखुट्टे फल्चा न्ह्यःने दिकातःगु रथं तुं कुहां बिज्याकाः खटय् तःगु खः । बुंगद्यःया रथ न्ह्यःने हे दिकातःगु चाकुबहाः द्यःया रथ धाःसा सालाः हाकनं टंगलय् हे यंकूगु दु ।
बुंगद्यःयात बुंगय् लितबिज्याकीबलय् बुंगमित छ्वालि च्याकाः नेखु खुसि तक वयाः लँ स्वः वइ । थुगुसी नं म्वःम्वः बुंगमित नं छ्वाली च्याकाः लँस्वःवःगु खः । बुंगय् लितबिज्याकीबलय् द्यःयात खटय् तयाः प्यम्ह पाँजुपिंसं क्वबियाः यंकी ।

कोरोनाया महामारीया दथुइ बुंगद्यःयात वंगु साउन १० गते रथय् बिज्याकूगु खःसां रथ सालेगु ज्या धाःसा जुइमफुगु खः । बुंगद्यः सालेगु बारे छुं निर्णय यायेमफयेवं वंगु भदौ १८ गते हुलमूलया दथुइ बुंगद्यः सालेगु ज्या जूगु खः । द्यः सालेगु झ्वलय् प्रहरीलिसे झडप जूगु खःसा थ्व लिपा २१ गते हाकनं द्यःयात विधिवत रुपं १० मिटरति जक सालाः जात्रा क्वचायेकूगु खः । कोरोना महामारीया कारणं भोटो क्यनेगु निसें मेमेगु छुं नं जात्रा मयासे बुंगद्यःयात बुंगय् लितबिज्याकूगु खः । स्वन्हु लिपा हे मलमास लगे जुइत्यंगु व मसमासया इलय् द्यः लितबिज्याके मजिउगुलिं जात्रा क्वचायेकूगु निन्हु लिपा हे साइट स्वयाः द्यः थौं लितबिज्याकेगु क्वःछिउगु खः ।

बुंगद्यःयात आः बुंगय् प्यन्हु तक छकू क्वथाय् तयातइ । थ्व प्यन्हु तक सुयातं बुंगद्यःया दर्शन याकेबीमखु । बुंगय् थ्यंगु प्यन्हु दयेवं बिचाः वनेगु धकाः येँ, यल, ख्वपयापिं पुजा वनी । अले जक बुंगद्यःयात देगलय् तइ । तर थुगुसी नं बुंगद्यःयात मू देगलय् धाःसा बिज्याके खनीमखुनि । २०७२ सालया तःभुखाचं दुंगु बुंगद्यःया देगः दनेगु ज्या क्वमचाःनिगुलिं आः नं बुंगद्यःयात देगःया लिउनेसं च्वंगु टहराय् हे बिज्याकी ।