प्यन्हु तक तंम्ह मिसामचा लुल
येँ (नेपालभाषा टाइम्स)÷ वंगु प्यन्हु न्ह्यवंनिसें तनाच्वंम्ह कालिमाटीया ११ दँ दुम्ह मिसा मचा समृद्धि मानन्धर लूगु दु । उम्ह मचायात टेकुया भिभा ब्यांकेट जःखः लँय् लुइकूगु खः ।
लूम्ह मचाया स्वास्थ्य अवस्था ठीक जूगु व छुं समस्या मदुगु खँ धाःगु दु । तर मचा प्यन्हु तक गन वनाच्वंगु व छु याना च्वंगु धइगु खँ धाःसा सीके मफुनिगु व मचां नं विश्वस्त कथंया लिसः मबिउगु खँ धाःगु दु ।
म्हिचाय् सछिदां जक ज्वनाः पिहां वंम्ह मचां प्यन्हु तक छु नल, स्वइथाय् च्वन, गन गन वन धइगु छुं सी मदुनि । वं थःगु मोबाइलया सिम कार्ड थम्हं हे वांछ्वया बियागु खँ धाःसां वयागु ल्हातय् च्वंगु मोबाइलया ब्याट्रीया चार्ज धाःसा फूल जुयाच्वंगु दु । वं प्यन्हु तक पिने फल्चाय् द्यनागु धकाः लिसः बिउगु व छन्हु पैदल हे भुइजःसि तक वनागु धकाः लिसः बिउगु खँ धाःगु दु ।
मिसामचा उकथं प्यन्हु तक बेपत्ता जूसां वयागु ख्वाः व मुड तसकं ‘फ्रेस’ खने दुगु खँ नं धाःगु दु ।
LEAVE YOUR COMMENTS