बैंकया ध्यबा डलरय् लगानी !

येँ – नेपाली मुद्रा सिबें डलरया भाः अप्वयेवं नेपाःया वाणिज्य बैंकतय्सं थःपिंके दुगु ध्यबा डलरय् लगानी यायेत विदेशय् छ्वःगु आशंका याःगु दु । बैंकतय्सं थःपिंके दुगु ध्यबा विदेश यंकूगुलिं थौंकन्हय् उमिके कर्जा बीत तकं ध्यबाया अभाव जुयाच्वंगु खँ धाःगु दु । ध्यबाया अभाव जूगु कारणं थौंकन्हय् बैंकतय्सं चिचीधंगु बाहेक तःगु रकमया कर्जा बीगु बन्द यानातःगु दु ।

स्वीकृत जुइधुंकूगु बाहेक न्हूगु कर्जा फुक्कं आःयात बन्द याना तःगु कारणं स्वदेशी लगानीकर्तातय्त समस्या जुयाच्वंगु खँ नं धाःगु दु ।
तर बैंकतय्सं धाःसा थःपिंसं डलरय् लगानी यानाच्वनागु खँयात अस्वीकार याःगु दु । कर्जा रोक्का याना तयेमाःगुया कारण बारे वाणिज्य बैंकतय्सं ‘तरलताया अभाव’ धकाः धायेगु यानाच्वंगु दु ।

वंगु मोहनिबलय् आपालं मनूतय्सं बैंकय् मुंका तःगु ध्यबा लिकयाः यंकूगु कारणं आः मोहनि सिधयेवं कर्जा बीत तकं ध्यबा मदुगुलिं ततःधंगु कर्जा रोके याना तयागु खँ धायेगु यानाच्वंगु दु ।तर राष्ट्र बैंकया पदाधिकारीतय्सं धाःसा वाणिज्य बैंकतय्सं यानाच्वंगु दावीयात पत्याः याये मफइगु खँ कनाच्वंगु दु ।

राष्ट्र बैंकया छगू उच्चसूत्रं धाः कथं थौंकन्हय् वाणिज्य बैंकतय्के ५३ अर्ब दां मुनाच्वंगु दु । थ्व धइगु वंगु असार महिनाय् स्वयां ३६ अर्ब तका अप्वः खः । ‘थ्व ध्यबा गन छ्वल उमिसं ?’ सूत्रं न्ह्यसः तःगु दु । राष्ट्र बैंक सूत्रया कथं वाणिज्य बैंकतय्सं थौंकन्हय् थःके दुगु ध्यबा अप्वः मात्राय् विदेशय् छ्वयाः डलरय् लगानी याकाच्वंगु दु ।

विदेशय् दंक न्याना हःगु डलर नेपालय् हयाः मीबलय् यक्व ध्यबा वइगु जुयाः थौंकन्हय् नेपाःया वाणिज्य बैंकत थ्वहे ज्याय् लगे जुयाच्वंगु दु । नेपाली मुद्राया तुलनाय् अमेरिकी डलरया भाः धमाधम थहां वनाच्वंगुलिं नेपाःया वाणिज्य बैंकतय्सं नं थःपिनि ध्यबा अप्वः थुखेपाखे हे लगे यानाच्वंगु दु । अप्वः ध्यबा विदेशय् वंगुलिं वाणिज्य बैंकतय्के कर्जा बीत तकं ध्यबा मदुगु खँ सूत्रं धाःगु दु ।