अर्बौंया राजश्व खतराय्

प्रधानन्यायाधीश पराजुलीया फैसला लिच्वः

येँ : सर्वोच्च अदालतया प्रधानन्यायाधीश गोपाल पराजुलीं एनसेल बारे याना बिउगु छगू फैसलां यानाः राज्य कोषय् दुहां वये माःगु अर्बौं तकाया राजश्व छखे लाःगु खँ सीदुगु दु ।
स्वीडेनया टेलिया सोलेरां एनसेल कम्पनी इन्डोनेशियाया आजियतायात मिउबलय् नेपाः सरकारयात ६० अर्ब तका पूँजीगत लाभकर पुलेमाःथाय् साढे २३ अर्ब तका जक पूगुलिं बाँकी ध्यबा नं पू वा धकाः नेपाः सरकारं ताकेता यानाच्वंगु खः । थ्व बाँकी ध्यबा मपूतले एनसेलपाखें याःगु फाइदाया ध्यबा विदेश यंके दइ मखु धकाः सरकारं पना तःगु खःसां सर्वोच्च अदालतया प्रधानन्यायाधीश पराजुलीं फाइदाया ध्यबा विदेश यंके दइ धकाः फैसला याना बिउगु खः । थुकिं यानाः लाभकर वापत उठे याये माःगु अर्बौं तका दां छखे लाइगु सम्भावना ब्वलंगु खः ।
सर्वोच्चया थ्व फैसलां यानाः नेपाःया ठूला करदाता कार्यालय आछु आछु कंगु दु । सर्वोच्चया उगु फैसला लिपा कर कार्यालयं नेपाःया छगू अंग्रेजी पत्रिकाय् विज्ञापन हे छापे यानाः पुले मानिगु लाभकर पू वा धकाः टेलिया सोलेरायात सुचं छ्वःगु खः ।
यदि टेलियां उगु सुचंयात वेवास्ता यात धाःसा स्वीडेनया पत्रपत्रिकाय् समेत सुचं प्रकाशित यानाः कर उठे यायेत कुतः यायेगु खँ कर कार्यालयं धाःगु दु ।
एनसेलपाखें वइगु फाइदाया ध्यबा विदेश यंके मदइगु जूगु जूसा लाभकरया ध्यबा अनं जूसां उठे यायेगु सम्भावना दइगु खः । तर सर्वोच्चं फाइदा ध्यबा रोके याये दइ मखु धकाः फैसला यायेवं थ्व ध्यबा आः गय् यानाः उठे याये फइ धकाः कर कार्यालय दुने तःधक सहलह जुयाच्वंगु खँ सूत्रं धाःगु दु ।
कर कार्यालयं आः छगू पुचः स्वीडेन हे छ्वयाः अनया सरकारी अधिकारीतय्त नापलानाः कर उठे यायेगु बारे सहलह यानाच्वंगु खँ नं सीदुगु दु । यदि फत धाःसा टेलियायात स्वीडेन दुने हे ब्ल्याक लिष्टय् तयेगु कुतः यायेगु खँ नं कर कार्यालयं धाःगु दु ।
प्रधानन्यायाधीशया सर्टिफिकेट छानबिन
सर्वोच्च अदालतं प्रधानन्यायाधीश गोपाल पराजुलीया एसएलसी पास जूगु सर्टिफिकेट व नागरिकताया जन्ममिति बारे छानबिन याइगु जूगु दु । वय्कःया आदेशं ज्वंके बिउम्ह डा. गोविन्द केसी धाःसा म्हिगः साधारण तारेखय् रिहा जुयादीगु दु । वय्कःया अनसन जारी दु ।