ने. सं. ११४४ ञलाथ्व नवमी -

थाय्थासय् बम, तीनकुनेय तयातःगु बम मखु

येँ – थनया तीनकुने बाग्मति ताँ लिक्कसं तयातःगु शंकास्पद वस्तु बम मजूगु खँ सेनां धाःगु दु । थन शंकास्पद वस्तु वांछ्वयातःगु खनेवं सेनाया बम डिस्पोजल पुचः वयाः उकिया जाँच याःगु खः ।
जाँच लिपा उगु सामान बम मजूगु पुष्टि जूगु खँ काठमाडौं प्रहरी परिसरया प्रमुख एसएसपी विश्वराज पोखराजं जानकारी बियादीगु दु ।
थौं नेपाल बन्दया आह्वान यानातःपिं विप्लव समूहं सर्वसाधारणयात ख्यायेत थुगु सामान तयातःगु खँ प्रहरीं धाःगु दु ।
मेखे बाग्लुङया बसपार्कय् धाःसा बम हे तयातःगु लुइकूगु दु । उकियात नेपाली सेनां निष्क्रिय याःगु दु । छगू गाडी शोरुम न्हयःन शंकास्पद वस्तु तयातःगु लुइवं प्रहरीयात खबर याःगु खः । उगु वस्तु बम हे जूगु पुष्टि जुइवं सेनाया बम डिस्पोजल पुचलं हटकेसय् तयातःगु बमयात निष्क्रिय यानाबिउगु खः ।
बाग्लुङ नगरपालिकाया धवलागिरि चोकय् धाःसा बम विस्फोट हे जूगु दु । विस्फोट जूगु थासय्या बँ हे गाःवंगु व लिक्कसं च्वंगु छेँया न्हाय्कं चुचुं जूगु खँ धाःगु दु । चान्हय् तःसः वयेक विस्फोट जूगु खँ स्थानीय बासिन्दातय्सं धाःगु दु । थन बम बन्दकर्तातय्सं हे तयाथकूगु अनुमान याःगु दु ।
अथेहे बाजुराया बुढीगंगा नगरपालिका बार्जुगाडया ताँय् नं थथे हे शंकास्पद वस्तु लुइकूगु दु । बोराय् चिनातःगु अवस्थाय् लुइकूगु उगु वस्तु छु खः धयागु सीमदुनि । सेनाया बम डिस्पोजलं पुचः उखेपाखे वनेधुंकूगु दु ।