आः जग्गा पास यायेगु ज्या नं स्थानीय तहयात

येँ (नेपालभाषा टाइम्स) – जग्गा न्याये-मीगु सम्बन्धी फुक्कं ज्या यायेगु अधिकार आः स्थानीय तहयात बीगु प्रक्रिया शुरु जूगु दु। जग्गा नामसारी, लिखत पारित, लालपूर्जा इनेगु लगायत फुक्कं ज्या स्थानीय तहलं यायेगु व्यवस्था यायेत भूमि व्यवस्थापन तथा अभिलेख विभागं ज्या शुरु याःगु दु ।

विभागया महानिर्देशक शेष नारायण पौडेलया कथं थुकिया निंतिं कानुन संशोधन यायेत भूमि व्यवस्था तथा सहकारी मन्त्रालयया सचिवया संयोजकत्वय् समिति नीस्वंगु दु। उगु समितिया प्रतिवेदन कथं मालपोत ऐन संशोधन जुइधुंकाः जग्गा सम्बन्धी फुक्कं ज्या स्थानीय तहपाखें जुइ ।

संविधानय् जग्गा प्रशासन सम्बन्धी ज्या स्थानीय तहपाखें जुइगु व्यवस्था यानातःगु दु। स्थानीय सरकार सञ्चालन सम्बन्धी ऐनय् नं अज्याःगु हे व्यवस्था दुगुलिं अधिकार हस्तान्तरणया तयारी जुयाच्वंगु खँ महानिर्देशक पौडेलं कनादीगु दु। उकथं हे आः इमेलपाखें हे छेँ जग्गा रोक्का वा फुक्का याये फइगु व्यवस्था जुइगु जूगु दु। आः फुक्कं ज्या बैंकं यानाः पुलेमाःगु दस्तुर मालपोतया खाताय् जम्मा जूगु भौचर लगायतया भ्वं सहित आधिकारिक इमेल छ्वयेधुंकाः मालपोतं जग्गा रोक्का यानाबी । थुगु व्यवस्था लागू जुइधुंकाः मालपोतय् भीड बछि म्हो जुइगु खँ नं महानिर्देशक पौडेलं धयादिल ।