हिमालं ३५ हजार किलो फोहर मुनाहल

येँ (नेपालभाषा टाइम्स)- थीथी हिमालय् मुनाच्वंगु फोहर मुनेगु निंतिं न्ह्याकूगु हिमाल सफा अभियान २०२३ सोमवाः छगू ज्याझ्वः यासें क्वचायेकूगु दु । ज्याझ्वलय् कोकाकोला फाउन्डेसनया ग्वाहालिइ नेपाली सेनापाखें न्ह्याकूगु अभियानय् ३५ हजार ७०८ किलो फोहर मुनाहःगु जानकारी बिउगु खः ।

नेपाली सेनाया नेतृत्वय् सगरमाथा, ल्हात्से, अन्नपूर्ण व बरुणत्से हिमाल थ्व अभियान न्ह्याकूगु खः । अभियानय् नेपाली सेनाया ३२ म्हेसिनं हिमालय् थहां वनाः फोहर मुनाहःगु खः ।

समापन ज्याझ्वलय् नेपाली सेनाया प्रमुख प्रभुराम शर्मां हिमाल सफा अभियानया सेनापाखें नेतृत्व याःपिं व समापन ज्याझ्वलय् थःपिनि अनुभव कनादीपिं हिमाल आरोहीपिं माया गुरुङ व पुर्णिमा श्रेष्ठयात कदरपत्र लःल्हाःगु खः ।

ज्याझ्वलय् हिमाल आरोहीपिं माया गुरुङं सगरमाथा क्षेत्रय् फोहर मुनाच्वंगु बारे कनादीगु खःसा मेम्ह आरोही पुर्णिमा श्रेष्ठं छाय् फोहर जुयाच्वन धयागु बारे कनादीगु खः ।
कोकाकोला फाउण्डेशनया ग्वाहालिं वंगु प्यदँ न्ह्यव निसें नेपाली सेनाया नेतृत्वय् हिमाल सफा अभियान न्ह्याका वयाच्वंगु दु ।

 

सम्बन्धित बुखँ

LEAVE YOUR COMMENTS