३ या हे नजिर आः ५ य् वनीगु

येँ – ३ नम्बर प्रदेशया नां व स्थायी राजधानी सम्बन्धी निर्णय जुइधुंकाः ल्यं दनिगु प्रदेश ५ या नां नं आः चर्चाय् वयाच्वं थें ‘लुम्बिनी’ जुइगु व स्थायी राजधानी बुटवल हे कायम जुइगु सम्भावना अप्वयावंगु दु। प्रदेश ५ सरकारया प्रवक्ता लिसें भौतिक पूर्वाधार मन्त्री वैजनाथ चौधरीं ३ नम्बर प्रदेशया नांव राजधानी विवाद समाधान लिपा प्रदेश ५ यात नं अःपुइ धासें थज्याःगु बिचाः तयादीगु खः ।

मन्त्री चौधरीं ३ नम्बर प्रदेशया नामाकरण व राजधानी बारे नेकपाया सचिवालयं बिउगु निर्देशन अःपुक पारित जूगुलिं आः ५ नम्बर प्रदेशयात राहत जूगु बिचाः तयादीगु खः । वय्कलं धयादी, ‘आः प्रदेश ३ या हे नजिर कयाः प्रदेश ५ य् नं नामाकरण व राजधानी कायम यायेगु ज्या जुइ ।’

प्रदेशया नां व राजधानी सिफारिस यायेत नीस्वंगु विशेष समितिं प्रदेशया नांया बारे छुं विवाद मदुसां राजधानी धाःसा बुटवल व दाब जुइमाःगु खँ न्ह्यथनातःगु दु। पहिचानवादीतय्सं धाःसा प्रदेशया नां थरुहट–मगरात तयेमाः धकाः माग याना वयाच्वंगु दु। प्रदेश ५ य् ३० प्रतिशतं मयाक मगः व थारु जाति दु ।