मेलम्चीया निगूगु चरणया निर्माणया निंतिं आवश्यक तयारी

येँ (नेपालभाषा टाइम्स) – मेलम्ची खानेपानी आयोजनाया निगूगु चरणया निर्माणया निंतिं आवश्यक तयारी शुरु जूगु दु। निगूगु चरणया निर्माणया निंतिं वातावरणीय मूल्यांकनयात ध्यान बीगु जूगु दु। उकिया निंतिं अध्ययन यायेत सम्बन्धित स्थानीय निकायपाखें सहमति बीगु नं धायेधुंकूगु खँ सीदुगु दु ।

मेलम्ची आयोजना अन्तर्गत न्हापांगु चरणय् मेलम्चीया लः येँय् हयेत सुरुबया परीक्षण याःगु इलय् जूगु दुर्घटनायात कयाः भिंकेगु ज्या जुयाच्वंगु इलय् हे लाक्क निगूगु चरणया निर्माणया निंतिं आवश्यक तयारी शुरु जूगु खः । मेलम्चीया निगूगु चरणया निर्माणया निंतिं याब्ग्री व लार्केय्प रामर्शदातां अध्ययन सिधयेकाः मेलम्ची विकास समितियात न्हापा हे प्रतिवेदन लःल्हायेधुंकूगु दु। सन् २०१८ य् हे परामर्शदातां निगूगु चरणया डिजाइन यानाः थःगु प्रतिवेदन समितियात लःल्हाःगु खः ।

समितिया सूचना अधिकारी राजेन्द्रप्रसाद पन्तं आयोजना निर्माणस्थलया वातावरणीय प्रभावसम्बन्धी अध्ययन यायेमाःगु व उकिया निंतिं पालिकाया सहमति पत्र माःगु जानकारी बियादिल । पालिकापाखें सहमति बीवं वातावरणीय प्रभावया मूल्यांकन यानाः वातावरण मन्त्रालयय् छ्वयेगु वय्कलं जानकारी बियादिल ।

परामर्शदातां निदँ न्ह्यः हे डिजाइन लःल्हाःगु खःसां अबलय् स्थानीयवासी थीथी माग न्ह्यब्वःगुलिं ज्या न्ह्याके मफुगु खःसा आः उगु मागमध्ये गुलिं आयोजनापाखें व गुलिं सम्बन्धित ज्याकूपाखें कार्यान्वयन यायेगु सहमति जूगु दु ।