महामारी तच्वया वनेवं सरकारया न्हूगु निर्णय : १५ न्हु लकडाउन मखुसां कडाई

येँ (नेपालभाषा टाइम्स) – स्वनिगः लगायत देय्या थीथी थासय् कोरोना संक्रमण अप्वया वनेवं सरकारं न्हापा लकडाउनया इलय् लागू यानातःगु थीथी कडाई छ्वासुकेगु धकाः लछि न्ह्यः याःगु निर्णययात १५ न्हुया निंतिं लिछ्याःगु दु ।

म्हिगः च्वंगु मन्त्रिपरिषद बैठकं कोरोना संक्रमण धमाधम अप्वया वना च्वनाच्वंगु कारणं आः स्वनिगः वये-वने याइगु सार्वजनिक यातायात भदौ १५ गतेनिसें जक खुले यायेगु निर्णय याःगु दु। थ्व स्वयां न्ह्यः सरकारं भदौ १ गतेनिसें स्वनिगः पिने यातायात खुले यायेगु निर्णय याःगु खः । स्वनिगः दुने हे सार्वजनिक गाडी बन्द याकेमाः धकाः स्वनिगःया नगरपालिका फोरमं याःगु इनापयात धाःसा सरकारं लागू मयाः ।

अथे हे भदौ १ गतेनिसें स्कूल कलेजय् भर्ना कायेगु धकाः याःगु निर्णय नं संशोधन यासें भदौ १५ गते तक लिछ्याःगु दुसा थीथी तहया परीक्षा कायेगु धकाः याःगु निर्णय नं आः तत्काल लागू याये मफइगु खँ धाःगु दु। उकथं हे होटल रेष्टुरेन्टय् नं तयारी खाना ज्वनाः वने जक दइ व अन हेच्वनाः नये मदइगु निर्णय नं याःगु दु । लिसें शैक्षिक संस्था, सिनेमा, हुल मुनाः स्वयेगु कासा, सफूधुकू, संग्रहालय, डान्स बार थेंज्याःगु निकाय नं बन्द हे यायेगु निर्णय नं याःगु दु ।

स्वास्थ्य सुरक्षायात हे प्रमुख थाय् बीमाःगु जूगुलिं धार्मिकस्थलय् दैनिक पुजाआजा बाहेक मेगु ज्या मयाकेगु, छुं नं कथंया जात्रा व नखःचखः छेँजःपिं जक च्वनाः हनेगु निर्णय नं याःगु दुसा मनूत मुनेगु, जमघट यायेगु, सेमिनार भेला यायेगु, सार्वजनिक ज्याझ्वः यायेगु सम्पूर्ण दिकेत नं इनाप याःगु दु ।

न्हियान्हिथंयात माःगु सामान आपूर्ति यायेगु ज्यायात सरकारं छुट बिया तःसां उकिया चालक व सहचालकतय्सं सुरक्षाया मापदण्ड पालना मयाःगु जुयाः उकी कडाई यायेगु खँ धाःगु दु । सरकारया निर्णय म्हिगः पत्रकार सम्मेलन यासें अर्थमन्त्री लिसें सरकारया प्रवक्ता युवराज खतिवडां सार्वजनिक यानादीगु खः । थथे यानाः कडाई यायेमाःसां थ्व ज्यायात धाःसा लकडाउन धाये मजिउगु खँ नं मन्त्री खतिवडां कनादिल ।

कर्मचारी ५० प्रतिशत जक
स्वनिगःया सीडीओ व स्थानीय तहतय्सं अत्यावश्यक बाहेक थःपिनि मेमेगु ज्या कटौती यायेधुंकूगु दुसा आः बैंक, वित्तीय निकायतय्सं नं ५० प्रतिशत जक कर्मचारी तयाः थःपिनि संस्था सञ्चालन यायेत सरकारं इनाप याःगु दु। ज्याकुथी यक्व मनूत च्वनाः ज्या यायेबलय् ल्वय् पुनीगु सम्भावना यक्व दइगु जूगुलिं वित्तीय संस्थातय्सं ५० कर्मचारीयात जक ज्याकुथी तयाः बाँकी कर्मचारीयात छेँय् हे तयाः ज्या याका तयेत नं इनाप याःगु दु। सरकारं थ्व स्वयां न्ह्यः छेँय् च्वनाः ज्या यायेगु प्रणाली (वर्किब फ्रम होम) यात मान्यता मबिउगु खःसा थ्व निर्णय लिपा थ्व प्रणालीयात सरकारपाखें हे मान्यता प्राप्त जूगु खँ धयाहःगु दु। थ्व ज्या मेमेगु सम्भावित निकायय् नं यायेत इनाप याःगु दु ।