गौशालाय् महानगरया डोजर, विरोध यानाच्वंपिं सुमन साय्मिलगायत प्यम्हेसित ज्वनायंकल

नेपालभाषा टाइम्स
- बुखँ
- राष्ट्रिय
किपा-किपा साभार अनलाइन खबर

येँ (नेपालभाषा टाइम्स)- येँ महानगरपालिकां गौशालाय् छेँ थुनेत डोजर चले याःगु इलय् विरोध याःपिं अभियन्ता सुमन साय्मि लिसें प्यम्हेसित प्रहरीं ज्वंगु दु । प्रहरीं साय्मि लिसें रविन्द्र श्रेष्ठ, दिपेन्द्र पन्त व मनोज महतयात ज्वनाः गौशाला स्थिति प्रहरी चौकीइ यंकूगु दु । चक्रपथं लँ अतिक्रमण यानाः छेँ दयेकातःगु धासें महानगरं खुला न्ह्यः वंगु जेठ थन डोजर चले यायेगु सुरु यायेधुंकूगु खः ।

चक्रपथं २५ मिटर दुने लाःगु जग्गा अतिक्रमण यानाः दयेकातःगु छेँ थुनेत महानगर प्रहरी छगू फौज हे ज्वनाः म्हिगः हाकनं गौशालाय् थ्यंगु खः । छेँ थुंवंपिं विरोधय् साय्मि लगायत स्थानीयत थुनेत्यंगु छेँय् क्वय् च्वनाच्वंगु खःसा उमित प्रहरीं सालाः लँय् हःगु खः । प्यम्ह न्याम्ह प्रहरी व महानगर प्रहरीं झातापाता यायेवं साय्मि लँय् हे ग्वतुलाबिउगु खः । लँय् ग्वतूम्ह साय्मियात प्रहरीं ल्ह्वंल्वहं यानाः चौकीइ यंकूगु खः ।

महानगरं सतक अतिक्रमण यानाः छेँ दनातःगु धकाः गौशालाया धर्मशाला बाहेक मेगु झिंनिखा छेँय् थुनेत्यंगु खः । तर स्थानीयतय्सं थःपिंके थुगु जग्गाया लालपुर्जा दुगु लिसें थःपिंसं छेँ दनाबलय् महानगरपालिकां हे नक्सा पास यानाबिउगु व नियमित कर तकं पुला वयाच्वनागु धासें अतिक्रमित जूगु धाःगु जग्गा थःपिनिगु हे जूगु दावी यानाच्वंगु खः । तर येँ जिल्ला अदालतं उमिगु दावी मगाः धासें जग्गा अतिक्रमण जूगु निर्णय याःगु खः । थुगु फैसलाविरुद्ध वंगु पुनरावेदनय् नं सर्वोच्च अदालतं जिल्ला अदालतया फैसला हे सदर यायेवं महानगरं छेँ थुंवंगु खः ।

छेँ थुंगु विरोध यानाच्वंपिं साय्मिलगायतयापिंसं अदालतया फैसलाया पूर्ण पाठ वयेधुंकाः छेँथुवाःत थःपिं हे दनावने धयाच्वंगु दुसां महानगरं जबर्जस्ती डोजर चले याःवःगुलिं थःपिं धर्नाय् च्वं वयेमाःगु खँ धाःगु दु । पूर्ण पाठय् क्षतिपूर्ति बीमाःगु खँ दुथ्याना वयेफुगुलिं महानगरं हथासं छेँ थुंगु द्वपं वय्कलं बियादीगु दु ।