दाफा म्येँया लोक लसय् म्युजिक भिडियो
येँ(नेपालभाषा टाइम्स)÷ यलया थैबय च्वंगु झीगु भिंद्यः पुचलं दाफा म्येँया लोकलसय् हालातःगु म्येँया म्युजिक भिडियो पिथंगु दु । थनया लुँहितिइ च्वंगु सीटीसी मलय् जूगु छगू ज्याझ्वःया दथुइ ‘हेरामाया मैंचा गन वनेगु’ बोलया म्येँया म्युजिक भिडियो पितब्वज्या याःगु खः ।
थैबया संगीत साधक निरञ्जन श्रेष्ठया सभापतित्वय् जूगु ज्याझ्वलय् वय्कलं हे लसकुस यानादीगु खःसा ख्यालिजुजु मदनकृष्ण श्रेष्ठं म्युजिक भिडियो सार्वजनिक यानादीगु खः । ज्याझ्वलय् झीगु भिंद्यः पुचलं वय्कःयात हनेज्या नं याःगु खः ।
म्येँ मुनादीम्ह राजकुमार श्रेष्ठं निर्माण यानादीगु म्युजिक भिडियोया निर्देशन, छाँयाकन, सम्पादन लूजः सिंहं यानादीगु खः । म्युजिक भिडियोया म्येँय् निशा देसार व किरण अमात्यं सः बियादीगु खःसा संगीत संयोजन भूपेन्द्र वज्राचार्यं यानादीगु खः ।
म्युजिक भिडियोय् पल्पसा श्रेष्ठ, कृष्णा अमात्य, सुदित श्रेष्ठ, सुभाष विष्ट लगायतया कलाकारं अभिनय यानादीगु दु । संकिपा समीक्षक प्रकाश साय्मिं नुगःखँ तयादीगु ज्याझ्वलय् कलाकार, प्राविधिकपिंत सुभाय् पौ नं लःल्हाःगु खः ।
LEAVE YOUR COMMENTS