ने. सं. ११४६ बछलाथ्व दुतिया -

पशुपतिया गुरुयोजनायात कयाः सर्वपक्षीय भेला, अध्ययन यायेत मन्त्रालयया कार्यदल

येँ (नेपालभाषा टाइम्स) – पशुपति विकास कोषं हःगु गुरुयोजनायात कयाः विवाद ब्वलनेवं संस्कृति, पर्यटन तथा नागरिक उड्डयन मन्त्रालयं विस्तृत अध्ययन यानाः सरोकारवालातय् राय सुझाव कयाः अन्तिम प्रतिवेदन दयेकेत छगू कार्यदल दयेकूगु दु ।

म्हिगः गुरुयोजनयात कयाः जूगु सर्वपक्षीय सहलहय् संस्कृति, पर्यटन तथा नगारिक उड्डयन मन्त्री योगेश भट्टराईनं थ्व कार्यदलया घोषणा यानादीगु खः । स्वम्ह दुजः दुगु कार्यदलय् मन्त्रालयया सहसचिव व संस्कृति महाशाखाया प्रमुख प्रदीप कोइराला, सहसचिव व योजना महाशाखाया प्रमुख कमल भट्टराई व पुरातत्व विभागया महानिर्दे शक दामोदर गौतमयात तःगु दु। कार्यदलयात सकलें पक्षलिसे सहलह यानाः प्रतिवेदन बुझे यायेत लछिया ई बियातःगु दु ।

म्हिगः सर्वपक्षीय भेलाय् कार्यदलया घोषणा यायेगु झ्वलय् मन्त्री भट्टराईनं पशुपतिया ऐतिहासिक, पुरातात्विक व सांस्कृतिक महत्वयात लिउने लाकाः छुं नं ज्या मजुइगु खँ धयादिल । तर वय्कलं विरोध जुल धकाः न्ह्याबलें ज्या दिका हे च्वने फइमखु धकाः नं धयादीगु दु। वय्कलं धयादीगु दु, ‘स्थानीय सरोकारवालातय् नं खँ न्यनेमाः, उकिं आः ज्या गन थ्यंगु खः, अन हे दिकेगु जुइ, तर अथे धकाः न्ह्याबलें दिका तये फइमखु, न्ह्यःने न्ह्याः वने हे माः ।’

वय्कलं वि.सं. २०४३ सालय् सरकारं तोके यानातःगु कोषया चारकिल्लायात हे मुख्य आधार दयेकाः गुरुयोजना दयेकागु खँ नं धयादीगु दु। ‘थ्व चारकिल्लाया दुने नं छुं ‘कोर’ क्षेत्र दु, उगु क्षेत्रय् मानववस्ती चीकेहे माः, मेथाय्या हकय् निजी संरचना दयेकेबलय् पशुपतिया महत्व मन्हनी कथं निश्चित मापदण्ड दयेकेमाःगु जुइ’ वय्कलं धयादीगु दु। वय्कलं गुरुयोजनाया नामय् पिने हल्ला जूकथं जात्रा पर्व न्हंके त्यनागु मदु धयादिल ।

गुरुयोजनायात कयाः विरोध सुरु जुइवं म्हिगः मन्त्रालयं स्थानीय जनप्रतिनिधि, राजनीतिक दलया प्रतिनिधि व सरोकारपक्षत लिसे सहलह याःगु खः । सहलहय् पशुपति लागा लाःगु क्षेत्रपाखें सांसद जुयाच्वंम्ह गगन थापा, प्रदेश सभाया सांसद नरोत्तम वैद्य, येँ महानगरपालिका ७ वडाया अध्यक्ष शुद्ध डंगोल, ८ वडाया अध्यक्ष दिनेशकुमार डंगोल, ९ वडाया अध्यक्ष रामकृष्ण श्रेष्ठ, राजनीतिक दलया प्रतिनिधि कथं निर्मल कुइँकेल, निर्मल देउला, प्रस्तावित गुरुयोजना विरुद्ध गठन याःगु संघर्ष समितिया प्रतिनिधि व मेपिं सरोकारवालातय्सं ब्वति काःगु खः ।

ज्याझ्वलय् न्ववासें सांसद गगन थापां प्रस्तावित गुरुयोजना गन थ्यंगु खः, अन दिकाः थप सहलह व परामर्श यायेमाःगु खँ धयादीगु खः । अथेहे सहलहय् सहभागी अप्वःसिनं वि.सं. २०५६ या गुरुयोजनाया हे समीक्षा जुइमाःगु खँ तःगु खः । उमिसं न्हापाया गुरुयोजनाया ज्या गुलि क्वचाल धयागु हे समीक्षा मयासे मेगु गुरुयोजना न्ह्याके मजिउगु खँ धाःगु दु ।

प्रस्तावित गुरुयोजनायात कडा विरोध यानाच्वंपिंसं ऐतिहासिक कालं निसें च्वना वयाच्वंपिं स्थानीय वासिन्दातय्त चिइकेवं थनया मौलिक संस्कृति न्हना वनीगु खँय् चिन्ता प्वंकूगु खः । गुरुयोजनाया नामय् स्थानीय नेवाःतय्त घरवारविहीन यायेत्यंगु खँ संघर्ष समितिं धया वयाच्वंगु दु ।

जात्रायात १० करोडया अक्षय कोष घोषणा
म्हिगः जूगु सर्वपक्षीय भेलाय् हे मन्त्री भट्टराईं पशुपतिइ जुइगु जात्रा पर्वया निंतिं झिगू करोडया अक्षय कोष दयेकेगु घोषणा नं यानादीगु खः । वय्कलं थ्व कोषय् पशुपति विकास कोषपाखें न्यागू करोड तयेगु व येँ महानगरपालिकापाखें न्यागू करोड तयेत इनाप यानादीगु खः । अक्षयकोष संचालनया निंतिं जात्रा पर्व संचालन याइगु गुथिपाखें छम्ह छम्ह प्रतिनिधि, जनप्रतिनिधि व पशुपति विकास कोषया प्रतिनिधि दइगु खँ धाःगु दु। पशुपतिइ थौंकन्हय् मुख्य यानाः गुंगू जात्रा पर्व न्यायेका वयाच्वंगु दु ।