रेशम चौधरीयात त्वःतकेत हःगु विधेयकय् तःधंगु दलतय् विरोध

येँ (नेपालभाषा टाइम्स)- थारु अभियन्ता रेशम चौधरीयात त्वःतेकेगु लागिं सरकारं हःगु अध्यादेशयात तःधंगु दल नेपाली कांग्रेस व नेकपा (एमालें) विरोध याःगु दु । रेशम चौधरीया पार्टी नागरिक उन्मुक्ति पार्टीयात नं आः गठन जुइगु न्हूगु सरकारय् हयेगु लागिं सरकारं चौधरीयात त्वःतकेगु कथंया थ्व अध्यादेश हःगु खँ धाःगु दु । अध्यादेश शितल निवास थ्यंगु जुयाः सकस्यां अन हे स्वयाच्वंगु दु ।

थारु लिसें जनजाति अभियन्तातय्सं धाःसा चौधरीयात सरकारं अनावश्यक रुपं ज्वनाः कुनातःगु खँ धाःगु दु । उमिगु धापू कथं गुगु इलय् टीकापुरय् प्रहरी अधिकृतया समेत हत्या जुइकथं घटना जूगु खः वकुन्हु रेशम चौधरी अन द हे मदु । घटनास्थलय् मदुम्ह चौधरीयात ज्वनाः कुनातःगुलिं थ्व गिरफ्तारी हे गलत खः धयाच्वंगु दु ।
चौधरीं थ्व स्वयां न्ह्यः भूमिगत जुयाः हे चुनाव त्याकादीगु खःसा वयां लिपा वय्कलं प्रहरीइ थः हे वनाः आत्मसमर्पण यानादीगु खः । लिपा जेलय् लानाच्वंम्ह चौधरीयात केपी ओलीया सरकारं पित हयाः शपथ ग्रहण याकाः त्वःतेगु कुतः याःगु खःसां त्वःते धाःसा मफुगु खः ।

आः जेलय् हे लानाच्वंम्ह खःसां चौधरीया पार्टीं चुनावय् धाःसा शानदार जित हासिल याःगु दु । चुनावय् वय्कःया कलाः व बौ निम्हं अत्यधिक मत हयाः निर्वाचित जुयादीगु दु । थुकथं चौधरीयात ज्वनाः कुनातःगु गलत खः धइगु खँ वय्कःयात प्राप्त जूगु जनमतं हे पुष्टि जुइधुंकूगु खँ नं धाःगु दु ।

टीकापुर घटना लिपा सरकारं कफ्र्यु लगे यानाः स्थानीय थारुतय्त ज्वनेगु व यातना बीगु ज्या याःगु खः । उकी आपालं थारु मिस्तय्त बलात्कार समेत याःगु खँ नं पिहां वयाच्वंगु दु । स्थानीय थारुतय्सं उगु घटनाया बारे नं छानबिन यायेमाः धकाः माग यानाच्वंगु दु ।