ने. सं. ११४६ बछलागा तृतीया -

लुँहितिइ लः वइगु ऐतिहासिक ध्वं स्यंकाबिल, स्थानीयपाखें विरोधय् धराहराया ज्या दिकल

येँ (नेपालभाषा टाइम्स)- येँया लुँहिति लः बाः वइगु सलंसः दँ पुलांगु सिँया ध्वं स्यंकाबिउगु दु । धरहरा दयेकाच्वंपिंसं डोजर चले यानाः ध्वं स्यंकाबिउगु खः । थ्व ध्वं लुँहितिइ लः वइगु परम्परागत मू ध्वं जूगु खँ धाःगु दु । ध्वं स्यंकाबिइवं स्थानीयतय्सं थुकिया विरोध यानाः धराहरा पुनर्निर्माणया ज्या दिकाबिउगु दु । सिँया लः बाः वइगु थ्व ध्वं लुँहिति दयेकूगु इलय् हे तयातःगु जूगुलिं थ्व सलंसः दँ पुलांगु पुरातात्विक महत्वया ध्वं खः ।

ध्वं स्यंकाबिइवं येँ महानगरपालिकाया मेयर बालेन्द्र शाह नं सोमवाः सुथय् लुँहितिइ वयाः स्वःवःगु खः । येँ महानगरपालिका २२ वडाया अध्यक्ष चिनिकाजी महर्जन लिसें स्थानीयतय्सं धराहरा पुनर्निर्माणया ज्या दिकाः दकलय् न्हापां लुँहितिइ प्राकृतिक रुपं लः हायेकेत यायेमाःगु ज्या निं यायेमाःगु माग यासें तत्काल मेगु ज्या दिकेत माग याःगु दु । मेयर शाहं नं धरहरा पुनर्निर्माणया ज्या दिकेत धाःगु दु । स्थानीयतय्सं आः अत्तेरी यानाः ज्या मदिकल धाःसा डोजरय् मि च्याकाबिइमालीगु ख्याच्वः नं बिउगु दु ।

स्थलगत निरीक्षण वने न्ह्यः जूगु पत्रकार सम्मेलनय् न्ववासें मेयर शाहं सरकार हे पुरातात्विक सम्पदा संरक्षणय् संवेदनशील मजूगु द्वपं बिउगु दु । लुँहिति थेंज्याःगु पुरातात्विक महत्व दुगु ऐतिहासिक सम्पदायात बेवास्ता यानाः धरहराया नामय् तुयुगु टावर दयेकाच्वंगु धासें वय्कलं सरकार हे असंवेदनशील जूगुलिं स्वनिगःया सम्पदा संरक्षणय् थाकुयाच्वंगु खँ धाःगु खः ।

पत्रकार सम्मेलनय् न्ववासें धरहरा सुन्धारा संरक्षण समितिया नायः गौतम डंगोलं धरहरा पुनर्निर्माणय् सरकार व ठकेदारतय्सं स्थानीयतय्त तसकं हे हेपे यानाः ज्या यानाच्वंगु धासें थःपिंसं अन थज्याःगु पुरातात्विक महत्वया ध्वं व मंगाः लुया वयेफुगुलिं गाः म्हुइबलय् स्थानीयतलिसे समन्वय यानाः सम्पदा मस्यनी कथं ज्या यायेत तःक्वः हे इनाप यानागु खःसां ठेकेदार कम्पनीं बेवास्ता यानाः ज्या याःगुलिं थज्याःगु पुरातात्विक ज्वलं क्षति जूगु द्वपं बिउगु दु । वय्कलं सिँया थ्व ध्वं लिच्छविकालीन जुइमाःगु धासें थ्व ध्वतं लः बाः वनीगु जूसां सलंसः दँ तक सिँ चनामवंसे ल्यनाच्वंगु धयागु थ्व सिँ हे छुकिया खः धयागु अध्ययन यायेमाःगु विषय जूगु खँ नं धाःगु दु ।

वि.सं. २०७२ सालया तःभुखाचं धराहरा क्वःदलेधुंकाः केपी ओली सरकारया पालय् अर्बौं तका लगानी यानाः धराहरा थेंज्याःगु न्हूगु टावर व पार्क दयेकेगु ज्या न्ह्याकूगु खः । थ्व ज्याया ठेक्का कयातःगु रमण जेभी कन्स्ट्रक्सनया प्रोजेक्ट म्यानेजर संजय नकर्मीं शहरी विकास मन्त्रालयपाखें वःगु निर्देशन कथं ट्यांकी दयेकेत गाः खनाबलय् डोजरं ध्वं स्यंकूगु खँ धाल । ठेकेदार कम्पनीया प्रतिनिधितय्सं स्थानीयतय्सं तःक्वः इनाप यातं नं समन्वय मयाःगुलिं पुरातात्विक सम्पदाय् क्षति फयेमाःगु द्वपं धरहरा सुन्धारा संरक्षण समितिया नायः डंगोलं बिउगु दु । लः ट्यांकि दयेकेत गाःखंबलय् पुरातात्विक महत्वया अप्पात नं लुयावःगु खः ।

स्थानीयतय्सं आः धरहरा पुनर्निर्माण यायेबलय् लुँहितिया ऐतिहासिक मूल्य मान्यता कथं पुननिर्माणया यायेगु प्रत्याभुति मवःतलय् परियोजनाया फुक्क ज्या बन्द यायेत व ध्वं स्यंकूगु ज्या याःपिंत तत्काल कारवाही यायेत माग याःगु दु । अथेहे सम्पदा पुनर्निर्माणया ज्याय् स्थानीय प्रतिनिधि व पुरातत्वविद्या अनिवार्य सहभागी दयेमाःगु, धरहरा पुनर्निर्माणया इलय् हेभि गाडी वये वनेगु जूगुलिं लँ स्यंगु दयेकाबीत नं माग याःगु दु ।

पत्रकार सम्मेलनय् संकटा क्लब, खिचापोखरी युथ क्लब, साधारण क्लब, त्वाःछेँ परिवार क्लब, धरहरा सुन्धारा संरक्षण समितिया प्रतिनिधिपिं नं उपस्थित दुगु खः ।