ने. सं. ११४६ चिल्लागा त्रयोदशी -

न्ह्यसः लिसः कासा निरन्तरताया निंतिं अक्षय कोष स्वनीगु

येँ – वल्र्ड नेवाः अर्गनाइजेस (डब्लुएनओ)पाखें ‘हलिं नेवाः न्ह्यसः लिसः कासा’यात निरन्तरता बीगु ल्याखं छगू अक्षय कोष नीस्वनीगु जूगु दु । नकतिनि जक न्हापांगु हलिं नेवाः न्ह्यसः लिसः कासा–११४१ सफलतापूर्वक क्वचायेकूगु कासा ग्वसाः खलःया समीक्षा मुँज्याय् कोष संचालन यायेगु विषयय् सहलह जूगु खः।

न्ह्यसः लिसः कासापाखें नेवाः भाय्, कला, साहित्य, संस्कृति, संगीत, सम्पदायात विश्वय् प्रवद्र्धन व संरक्षणलिसें न्हू पुस्तायात नं उकिया जानकारी याके फइगु माध्यम जूगु धासें उकियात अझ सशक्त याना यंकेमाःगु खँय् बैठकय्् सहभागितय्सं बः बिउगु दु ।

छगू अक्षय कोष हे नीस्वनाः वन धाःसा कासायात निरन्तरता बिया वना च्वने फइ धइगु ल्याखं ताःई न्ह्यवंनिसें बेलायतय् च्वना वयाच्वनादीम्ह डा. लोचन मानन्धरं कोषया निंतिं थम्हं आर्थिक ग्वाहालि यायेगु प्रतिवद्धता प्वंकादीगु खः ।

डब्लुएनओया नायः सिजन श्रेष्ठं संस्थापाखें याना वयाच्वंगु थीथी ज्याझ्वःमध्ये थुगु कासा नं छगू ऐतिहासिक उपलब्धि जूगु व थुकिं ल्याय्म्हतय् ध्यान सालेत सफल जूगु विचाः तयादिल ।

अर्गनाइजेसनया न्वकु संयुक्त श्रेष्ठं कासाय् न्यंगु न्ह्यसःया निंतिं एप्स दयेके फत धाःसा ल्याय्म्हतय्सं मनोरञ्जनया माध्यमं नेवाः संस्कृतिया थीथी पक्षयात नं थुइकेत अःपुइगु खँ कनादिल ।

न्हापांगु न्ह्यसः लिसः कासाय् न्ह्यसः निर्माण समितिया कजिलिसें साहित्यकार केशरमान ताम्राकारं न्हापांगु कासाय् न्यंगु नापं मेमेगु न्ह्यसःत दुथ्याकाः सफूया स्वरुप बी फत धाःसा वइगु दिनय् कासा यायेत ग्वाहालि जइगु खँ कनादिल ।

न्ह्यसः लिसः कासाया कजि विमलमान श्रेष्ठं म्हो इलय् नं सकसिगुं ग्वाहालिया कारणं अन्तर्राष्ट्रिय स्तरया कासा सफलतापूर्वक क्वचाःगुलिं ग्वाहालि यानादीपिं सकसितं सुभाय् देछानादिल ।