उपत्यका विकास प्राधिकरण कब्जा कायेगु जुइ- केशव स्थापित । काठमाडौंयात छक्वः मवसें हे मगाःगु थाय् दयेकेगु जिगु कुतः जुइ- सिर्जना सिंह

वइगु वैशाख ३० गते जुइत्य‌ंगु स्थानीय तहया चुनावय् येँ महानगरपालिकाय् नेकपा एमालेपाखें उम्मेदवार जुयादीम्ह केशव स्थापित व नेपाली कांग्रेसपाखें उम्मेदवार जुयादीम्ह सिर्जना सिंहलिसेया नेपालभाषा टाइम्सपाखे‌ं यानागु खँल्हाबल्हा ।

उपत्यका विकास प्राधिकरण कब्जा यायेगु जुइ- केशव स्थापित

चुनाव प्रचार गुकथं न्ह्यानाच्वंगु दु ?
आः जनताया छेँय् छेँय् वनेगु, भेला यायेगु, नापलायेगु ज्यायात तीव्रता बियाच्वनागु दु । थुकिं छगू तःधंगु उत्साह ब्वलंगु दु । जनताया प्रतिक्रिया अतिकं सकारात्मक दु । जिं ला धाये हे धुन, झी त्यायेधुंकल धकाः । आः सगं जक काये ल्यं दनि । येँया जनतायात जिगु बारे यक्व थुइका च्वनेमाःगु आवश्यकता हे मदु । जितः न्हापा नं यक्वस्यां माया याःगु खः, आः झन अप्वः याना हःगु दु ।

छितः शहर निर्माणया म्हगस खनीम्ह नेता धायेगु याः, आः छु म्हगस खंकाच्वनागु दु ?
थ्व येँ देय् न्हापा गथे खः थ्वयात वहे अवस्थाय् यंकाः पुनरुत्थान यायेगु जिगु ग्वसाः खः । छिं छक्वः मल्लकालीन येँ देय्या कल्पना यानादिसँ, लिच्छविकालीन येँ देय्या कल्पना यानादिसँ । थ्वयात वहे कथं पुनर्जीवन बीगु जुइ । उकिया नापनापं थन फुक्क कथंया आधुनिक सुविधा नं दइ । सुविधा हे मदुसा मनू गय् च्वनी ? मनू हे मच्वन धाःसा पुनरुत्थान यायेगु ज्या गय् यानाः न्ह्याइ ?

महानगरपालिकां कक्षा १ निसें ८ तक नेपालभाषाया माध्यमं ब्वंकेगु कथं याःगु व्यवस्था आः छु जुइ धइगु खँय् यक्वसिया चिउताः दु, उकिया बारे छिं धयादी ?
व ला शुरु जुइ हे धुंकल, व जारी हे जुइ । तर जिगु बिचाः मातृभाषा जक मखु महानगरया शिक्षाया धार हे हिलेमाः धइगु कथंया दु । पाराडाइम शिफ्ट धाइ नि । झीगु शिक्षा पद्धति तसकं पुलां जुइधुंकल । उकियात न्हूगु कथं हिलेमाः । नेपालभाषां ब्वनीपिं मांभाय् प्रेमी जक मखु, कम्पिटेन्ट नं जुइमाः । उमित कम्पिटेन्ट समेत दयेकेगु व्यवस्था याना यंके । उकी सुनां शंका याये हे म्वाः ।

येँ देय् धइगु कला, संस्कृति, सम्पदाय् धनी महानगर खः । थ्व सम्पदायात च्वन्ह्याकेगु ज्याय् छिगु छु ग्वसाः दु ?
स्वयादिसँ, झीगु थ्व सम्पदा धइगु झीगु हे समाजया सम्पत्ति खः । समाजं छु धाल जिं वहे यायेगु खः । जि नं थ्वहे समाजया छगू अंग खः । झीगु सम्पदाया कारणं यानाः हे थन टुरिस्टत वइगु खः । तर टुरिस्ट सालेत थ्वहे सम्पदा जक क्यने धयां मजिउ छु । टुरिस्ट सालेत न्हून्हूगु आकर्षण नं निर्माण यायेमाः, प्रशस्त सेवा व सुविधा बीमाः । पर्यटकतय्त माःगु सेवा सुविधा बी मफुत धाःसा छक्वः वःम्ह टुरिस्ट हानं वइ मखु । जिपिं सम्पदाय् धनी जक धयां मजिउ । उकिं थ्व सम्पदा स्वः वइपिं टुरिस्टतय् लागिं सेवा नं विकास याना यंकेगु जुइ ।

न्हापा छि मेयर जुयादीबलय् सतक विस्तारया नामय् आपालं स्थानीय मनूतय् छेँ थुनेगु ज्या यात धइगु नं द्वपं दु, उकिया बारे छु धयादी ?
जिं गन सतक विस्तार यानागु दु धकाः । कलंकीया सतक विस्तार सरकारया ज्या खः, उकिं जिं ग्वाहालि यानागु खः । कालिमाटी–टंकेश्वरया लँ तबाला यायेत्यंबलय् स्थानीय मनूतय् विरोध वल, भाइकाजीयात जिं हे नापलानाः अन लँ तबाला यायेम्वाः धयागु खः । लिपा व लँ तबाला नं मयात । तबालागु सतकय् ज्या यायेगु, शहरया निर्माण यायेत गाक्क अधिकार ला महानगरयात बियातःगु हे मदु । व अधिकार ला ल्वानाः काये मानि का ।

अज्याःगु अधिकार दुगु उपत्यका विकास प्राधिकरण ला खारेज यायेमाः धकाः नं सः थ्वयाच्वंगु दु, उकिया बारे छिगु छु बिचाः दु ?
खारेज यायेगु मखु, कब्जाय् कायेगु खः । प्राधिकरण खारेज यात धाःसा संस्था जकं खारेज जुइ का, वयाके दुगु अधिकार ला हानं मेगु संस्थाय् वनी, वा मन्त्रालयय् वनी । उकिं व संस्थायात हे स्वनिगःया नगरपालिकात मिले जुयाः थःगु मातहत हल धाःसा अधिकार नं थःगु ल्हातय् वल नि । स्वनिगःया नगरपालिकातय् फोरम छगू ला दयेका हे तयेधुंकल, प्राधिकरणया अधिकार थ्वहे फोरमयात बिल धाःसा थ्वं ज्या नं याये फइ नि ।

येँय् निर्माण यक्व जुल, खुल्ला थाय् मगात धयाच्वंगु दु, आः खुल्ला थाय्या व्यवस्थापन गय् यानाः यानादी ?
स्वयादिसँ, म्वाः–मी मदुथाय् दनातःगु पःखाः छगः निगः तछ्यात धाःसा थन मज्जां खुल्ला थाय् पिहां वइ । केशर महलया पःखाः छगः तछ्यात धाःसा अन दुनेया थाय् फुक्क खुल्ला जुल मखुला ? नारायणहितिया पःखाः भचा तछ्यात धाःसा व थाय् नं खुल्ला जुइ । येँय् २४३ गू अज्याःगु थाय् जिं म्हसीका तयागु दु । यक्व सनाच्वने हे म्वाः ।

छिं धाःथें ज्या याना वनेत ला ध्यबा नं प्रशस्त माल नि, ध्यबा गनं वइ ?
ध्यबा माक्वं दु । ध्यबाया स्रोत जिं सिउ । आः २० अर्बया थासय् ४० अर्बया बजेट दयेकेगु जुइ । ज्या यायेगु जक धायेमाः थन ध्यबा माक्व वइ ।

काठमाडौंयात छक्वः मवसें हे मगाःगु थाय् दयेकेगु जिगु कुतः जुइ- सिर्जना सिंह

थौंकन्हय् छि यक्व धइथें द्यःयाथाय् पुजा यायेत झायाच्वनादीगु खनेदु । चुनावया कारणं हे खः लाकि ?
द्यइके ला जि न्हापा नं वनाच्वनेगु खः । व जिगु नियमित दिनचर्या हे खः । थुगुसी चुनाव न्ह्यः वनाबलय् चाहिँ बरु जिं थ्व देगःयात गय् यानाः बांलाके फइ, गन गन मर्मत सम्भार याये माली धकाः नं स्वयेगु यानाच्वनागु दु । थुपिं देगः, चैत्य, सतः, फल्चा थेंज्याःगु सम्पदा बांलाःसा हे ला झीगु येँ देय् नं बांलाइगु खः नि ।

थुपिं सम्पदा बांलाकेगु लागिं छिगु छुं विशेष योजना दु ला ?
दकलय् न्हापां ला २०७२ सालया भुखाचं दुना वंगु आपालं देगलय् तेका नकातःगु खनेदु । अज्याःगु देगः निं दकलय् न्हापां पुनर्निर्माण यायेगु जुइ । गथे कि कुमारी छेँ हे धयादिसँ, अज्याःगु देगःत मेमेगु नं दु । अझ जिं ला भुखाचं दुना वंगु छेँया छेँथुवाःतय्त तकं ग्वाहालि यायेमाःगु आवश्यकता खंकाच्वनागु दु । छेँ दुनाः गुलिसियां थः च्वनेत समस्या जुयाच्वंगु दु, गुलिसियां बालं बी मखनाः छुं भचा दइगु आयस्रोत नं बन्द जुयाच्वंगु दु । उकिं महानगरया अज्याःपिं निवासीयात नं ग्वाहालि यायेमाःगु दु ।

झी येँ देय्या नेवाःतय्सं येँ महानगरपालिकां विद्यालयय् शुरु याःगु नेपालभाषा पठनपाठन निरन्तर जुइ लाकि मजुइ धइगुली चिउताः कयाच्वंगु दु, थ्वबारे छिगु छु बिचाः दु ?
व बारे जितः बांलाक जानकारी दु । नेपालभाषा ब्वंकेगु थ्व ज्यायात जिं नं निरन्तरता बी । उकियात अझ बांलाक व सशक्त याना यंकेगु ज्या समेत जिं याये । बरु उकिया लागिं छु याये माली, गथे याये माली धकाः जिं सम्बन्धित सकसिकें सुझाव काये । थुकी सकलें ढुक्क हे जुयादीसां जिउ ।

येँ देय्यात गज्याःगु नगर दयेकेगु छिगु योजना दु ?
स्वयादिसँ, काठमाडौं धइगु ला अथें नं बांलाःगु, सम्पदां जाःगु नगर खः । थौं मरुभूमि थेंज्याःगु थाय् ला हराभरा जुइधुंकल धाःसा झीगु येँ देय् ला अथें हे हराभरा थाय् खः । थ्वयात भचा व्यवस्थित यात धाःसा थ्वयात झीसं तसकं बांलाःगु नगर दयेकेफु । थनया फुक्क पुरातात्विक सम्पदाया संरक्षण, संवद्र्धन व व्यवस्थित यानाः थ्व काठमाडौं धइगु छक्वः मवसें हे मगाःगु थाय् धकाः विश्वयात हे क्यनेगु जिगु कुतः जुइ ।

सम्पदा संरक्षणया लागिं छिगु योजना छु दु ?
थनया देगः, विहार धर्मय् अलग अलग खःसां झीगु धर्मत थवंथवय् स्वापू दु । उकिं थुकियात गनं हे छुं भेदभाव मतसे दयेका यंकेगु ज्या याये । जि छुं हे पदय् मदुसां नं विश्व शान्ति विहार दयेकेगु ज्याय् जिं यक्व ग्वाहालि यानागु दु । झीगु यक्व देगः, फल्चा, विहार आदि दयेकेमाःगु जिं खंकागु दु । जि ला काठमाडौंलय् ज्या यायेत वयागु खः । उकिं जिं थनया गुथि, जात्रा, पर्व, संस्कृतियात च्वन्ह्याकाः काठमाडौंयात पूर्ण रुपं सुरक्षित, सुन्दर, हराभरा व सम्पन्न, व्यवस्थित काठमाडौं दयेकेगु ज्या याये । थ्व जिगु प्रतिवद्धता हे खः ।

छि मिसा उम्मेदवार जूगु नातां मिस्तय् लागिं छु विशेष योजना दु ?
मिसापिं सशक्त जुइगु आधार धइगु आर्थिक सवलता खः, उकिं मिस्तय्त आर्थिक रुपं सवल यायेगु योजना जिं हये । तर जिं मिसा जक मखु, मिजंतय् लागिं नं योजना हयेगु जुइ । खास यानाः कलाः मदयाः विदुर जुयाच्वंपिं महानगरवासीयात नं भत्ता बीगु जिगु योजना दु ।

सम्पदा बाहेक मेगु क्षेत्रय् यायेगु छु छु योजना दु ?
जिं जिगु योजना फुक्क सार्वजनिक यायेधुनागु दु । जिं धया हे च्वनागु दु, मनूया जीवनय् कोखंनिसें घाट तकयात माःगु फुक्क हे क्षेत्रयात स्वयेगु जुइ । जि येँयाम्ह हे भौमचा जूगु कारणं येँ देय्यात जिं बांलाक म्हसिउ । थनया स्थानीय जनतां गज्याःगु समस्या फये मालाच्वन धइगु खँ नं जिं बांलाक थू । व समस्या समाधान यायेत जि व जिगु पार्टी छफुति हे लिचिली मखु, न्हापा नं गबलें लिचिउगु मदु ।