ने. सं. ११४४ ञलाथ्व दशमी -

‘सरकारं एमसिसि संसदं पास यायेगु प्रतिवद्धता प्वंकूगु दु’

येँ – अमेरिकी परियोजना मिलिनियम च्यालेन्स कर्पोरेशन (एमसिसि)यात कयाः नेपालय् विरोध जुयाच्वंगु इलय् कर्पोरेशनं धाःसा नेपाल सरकारं एमसिसि संसदं पास यायेगु प्रतिवद्धता प्वंकूगु खँ धाःगु दु ।

अमेरिकाया वाशिंगटनय् जूगु कर्पोरेशनया चौमासिक समीक्षा बैठकय् नेपाःयात बीगु ग्वाहालियात कयाः जूगु सहलह लिपा कर्पोरेशनं छगू वक्तव्य हे पिकयाः नेपाः सरकारं संसदं एमएमसि पारित यायेगु प्रतिबद्धता प्वंकूगु खँ धाःगु खः ।

वंगु सेप्टेम्बरय् एमसिसिया उपाध्यक्ष फातिमा जी सुमार व नोवेम्भरय् अमेरिकी विदेशमन्त्री डोनाल्ड लुं नेपाःया प्रधानमन्त्री शेरबहादुर देउवाया लिसें कांग्रेस, एमाले, माओवादीया शीर्ष नेतात नापलानाः एमसिसिया बारे जानकारी काःगु खः ।

एमसिसिं जारी याःगु वक्तव्यय् एमसिसिया निर्देशक समितिया बैठकय् नेपाःलिसे जूगु सम्झौता बारे सहलह जूगु न्ह्यथँसें नेपाः सरकारं याकनं हे एमसिसि अनुमोदन यायेत प्रतिबद्धता प्वंकूगु जानकारी निर्देशकतय्सं काःगु दु धकाः धयातःगु दु ।

थ्वहे दथुइ आः न्ह्याःगु संसद अधिवेशनया इलय् सरकारं एमसिसि पारित यायेगु निंतिं ज्या न्ह्याकीगु चर्चा सुरु जूगु दु । एमाले अध्यक्ष केपी ओली प्रधानमन्त्री जुयाच्वंगु इलय् वय्कलं २०७६ असार ३० गते संसदय् एमसिसि पारित यायेगु निंतिं दर्ता याःगु खः । तर पार्टी दुने जूगु ल्वापुं यानाः वय्कलं संसदय् धाःसा यंकेमफुत । ओली लिपा प्रधानमन्त्री जूम्ह कांग्रेस सभापति देउवां ला सुरु निसें हे थः एमसिसि सम्झौता न्ह्याकेगु पक्षय् दु धकाः धया वयाच्वनादीगु दु ।

मेखे सत्ता गठबन्धनया शीर्ष नेतातय्सं धाःसा गठबन्धन दुने सहलह यानाः जक एमसिसिबारे निर्णय यायेगु धाःगु दु । सत्ता गठबन्धनय् दुपिं माओवादी केन्द्र व नेकपा एकीकृत समाजवादीया अप्वः थें नेतात धाःसा थ्व सम्झौताया छुं शर्त संशोधन यानाः जक पारित यायेमाः धयागु पक्षय् दु ।