थनिंनिसें अनलाइन कक्षा बन्द
प्याब्सन व एनप्याब्सनपाखें शिक्षकतय्त बेतलबी बिदा बीगु घोषणा
येँ (नेपालभाषा टाइम्स) – निजी विद्यालयतय्सं थनिंनिसें देय्न्यंकं अनलाइन कक्षा दिकीगु जूगु दु। नेशनल प्याब्सन व प्याब्सनं म्हिगः छगू मंकाः विज्ञप्ति पिकासें थनिंनिसें अनलाइन कक्षा दिकेगु घोषणा याःगु खः । थुकिया लिसें शिक्षकतय्त नं आवंलि बेतलबी बिदा बीगु खँ विज्ञप्तिइ धयातःगु दु ।
कोरोना भाइरसया संक्रमणया ग्याःचिकुं लकडाउन जुइधुंकाः निजी विद्यालयतय्त जूगु समस्यायात कयाः सरकारं सम्बोधन मयाःगु धासें विद्यालय संगठनतय्सं अनलाइन कक्षा दिकेगु क्वःछिउगु खः । निजी विद्यालयतय्त आर्थिक रुपं समस्या जुयाच्वंगु कक्षा संचालन याये मफइगु खँ उमिसं धाःगु दु ।
विज्ञप्तिइ धयातःगु दु, ‘आर्थिक व व्यावसायिक संकट वःगुलिं विद्यालय बन्द यायेगु हे बांलाःगु विकल्प जूगु दु। उकिं साउन १ गते निसें फुक्कं वैकल्पिक शिक्षण सिकाइ क्रियाकलाप दिकाः शिक्षक व कर्मचारीतय्त बेतलबी घर बिदा बीगु अप्रिय निर्णय यायेत बाध्य जूगु दु।’
निजी विद्यालयतय्सं अनलाइन कक्षा कायेधुंकाः ११ महिनाया शुल्क पुलेमाः धयाच्वंगु खः । थुपिं निगू विद्यार्थी संगठनं छुं न्हि न्ह्यः हे छगू विज्ञप्ति पिकयाः अभिभावकपिंत विद्यालयया शुल्क पुलेत इनाप याःगु खः । तर विद्यालय शुल्क पुलेगु खँय् अभिभावकपिनिपाखें व्यापक विरोध जूगु खःसा सरकारं नं अनलाइन कक्षाया नामय् शुल्क कायेमदइगु खँ धाःगु खः ।
निजी विद्यालय संगठनतय्सं असार २१ गते शिक्षा मन्त्रालयय् जूगु सहमति कथं नं ठोस निकास पिकाये मफुगु खँ धाःगु दु। प्याब्सनया अध्यक्ष टिकाराम पुरीं विद्यार्थीपाखें शुल्क म्हये मखंगुलिं विद्यालय संचालन यायेगु अवस्थाय् मन्त धयादिसें गुबलें सरकारं जिमिगु माग सम्बोधन याइ उबलय् निसें कक्षा न्ह्याइ धयादीगु दु। निजी स्कूलतय्सं वैशाखंनिसें शिक्षकतय्त लब बीमफुगु, छेँ बहाः, बैंकया ब्याज-किस्ता, इन्टरनेटया खर्च पुलेमफुगु खँ धाःगु दु ।
मेखे निगू संगठनतय्सं अनलाइन कक्षा दिकेगु घोषणा यायेधुंकाः अनलाइन कक्षा कयाः ध्यबा म्हयेधुंकूगु स्कुलतय्सं छु याइ धयागु धाःसा अन्योल ब्वलंगु दु। गुलिखे स्कुलं अनलाइन कक्षा कयाः विद्यार्थीपिंपाखें शुल्क कायेधुंकूगु दु। थज्याःगु स्कूलतय्सं आः थःपिनिगु मू संगठनया घोषणा कथं अनलाइन कक्षा दिकी लाकि संचालन हे यानाच्वनी धयागु खँ अभिभावकतय्सं न्ह्यसः थनाच्वंगु दु ।
LEAVE YOUR COMMENTS