क्यानाडाय् क्वातिपुन्हि व यँयाःपुन्हि

येँ (नेपालभाषा टाइम्स) – नेवाः कल्चरल सोसाइटी अफ अल्बर्टाया ग्वसालय् क्वाति पुन्हि व यँयाःपुन्हि छक्वलं हनेगु ज्या याःगु दु। सोसाइटीया ग्वसालय् क्यान्डाया एडमन्टन शहरया नेवाःतय्सं न्हय्क्वःखुसी उगु ज्याझ्वः याःगु खः ।

विश्वव्यापी कोभिड-१९या महामारीया कारणं सोसाइटीपाखें लिबाक हे जूसां नेवाः संस्कृतियात विदेशय् प्रचार व प्रवद्र्धन यायेगु ल्याखं उगु ज्याझ्वः याःगु खः । संस्थाया नायः डा. हेमन्त जोशीं कोभिडया प्रकोप दथुइ नं विदेशय् च्वना वयाच्वंपिं नेपाःमितय्सं थःगु संस्कृति, संस्कारयात ल्यंकेत न्ह्यचिउगु खँय् लसता प्वंकादिल ।

भर्चुअल माध्यमं जूगु ज्याझ्वलय् नेवाः देय् दबूया नायः नरेश ताम्राकारं क्यानाडाय् च्वनाच्वंपिं नेपाःमियात भिंतुना बियादिसें वइगु दिनय् अल्बर्टालिसें विश्वया मेमेगु देशय् च्वनाच्वंपिं नेवाःत नाप नं सहकार्य याना वनेगु जुइ धयादिल ।

उपाध्यक्ष त्रिप्रसाद धौभडेलं नेवाः समाजं आतक याना वयाच्वंगु गतिविधिया बारे जानकारी बियादीगु खःसा मूछ्याञ्जे वीरेन्द्र कायस्थं सुभाय् देछानादीगु खः । उगु इलय् सोसाइटीपाखें थगुने याःगु थीथी ज्याझ्वः, गतिविधिलिसें कुमारि, भैरव, लाखे प्याखंया भिडियो नं न्ह्यब्वःगु खः ।