थौं तिंख्यलय् गुरुमापायात जा

येँ – थौं होलि पुन्हि खःसां कोरोना भाइरसया कारणं सरकारं होलि मम्हितेत सार्वजनिक सुचं जारी यानातःगु कारणं होलि सम्बन्धी सार्वजनिक ज्याझ्वःत फुक्कं रद्द जूगु दु ।

थौंया होलियात मनूतय्सं औपचारिक पर्वया रुपय् जक हनेगु मनःस्थिति दयेकाच्वंगु सीदुगु दु। बसन्तपुली थनातःगु चीर नं थौं हे क्वःथलीगु ज्याझ्वः दु। थौं बहनीसिया ७.११ बजे चीर क्वःथलीगु साइत पिकया तःगु दु। अनं चीर सालायंकाः च्याकेगु ज्या धाःसा बहनीससिया ८.५१ बजे जुइ । बसन्तपुली चीर क्वःथलाः उकियात तिंख्यलय् यंकाः च्याकीगु खः ।

मेखे थौं हे बहनी थनया किलाघः त्वाःया ज्यापुतय्सं तिंख्यलय् गुरुमापायात जा नकीगु नं चलन दु। थौं छमुरि वाया जाकि व छम्ह म्येय्या ला दयेकाः तिंख्यलय् गुरुमापायात नकीगु परम्परा दु । उकिया लागिं म्हिगःनिसें हे ज्वरे यायेगु शुरु जुइधुंकूगु दु। म्येय् स्यानाः ज्वरे याःगु घासा ताम्सिपाखाय् च्वंगु गुरुमापा ख्यलय् छानाःलि तिंख्यलय् यंकेगु याइ ।

किलाघलंनिसें थ्व जा क्वबिया वनीबलय् लँय् गनं दिके मजिउ धाइ । तिंख्यलय् थ्व जाया प्रसाद नल धाःसा छुं कथंया ल्वचं थी मखु धइगु नं विश्वास दु ।